للنقد قيمة متغيرة نتيجة عوامل كثير بداية بتكلفة الفرصة البديلة وصولاً للأهم و هو التضخم، فالقيمة الحالية للنقود أهم و أكبر من قيمتها المستقبلية لأن استخدام المال الآن يعطينا شعور بالرضا وإشباع أفضل من المستقبل! مثلاً الريال اللي كان يشتري لك ٥ أقلام بعد أثر التضخم بيجيب لك ٣ فقط

• بما أنه الريال اليوم مايساوي ريال بكرة أو بمعنى ثاني قيمته اليوم أكثر! هل فيه شيء يخليني كمستثمر أفضل استثمار يعطيني ١٠٠ بعد سنة على ١٠٠ اقدر احصل عليها اليوم؟ مستحيل! ١٠٠ باليد أكيد أفضل من ١٠٠ على الشجرة والقرار غير مجدي، لكن بفتراض عائد ٥٪ مثلاً وصولاً لـ ١٠٥ على الشجرة؟

• وقتها قراري بيكون مختلف لكن الـ٥٪ مثلت لي ايش؟هذي هي تكلفة الإنتظار أو العائد اللي بيأثر على قراري الأستثماري، كيف اعرف هل الـ١٠٥ مساوية لـ١٠٠ اللي ممكن احصل عليها اليوم؟ هالشيء يتم حسابه بمعادلة القيمة الزمنية للنقود واللي بصوره أبسط تعطيني ريالي اليوم كم يساوي بالمستقبل و العكس

• بإستخدام القانون نقدر نشوف أنه ١٠٠ اليوم = ١٠٥ بعد سنة بإفتراض عائد ٥٪ بمعنى أنه سواء اخترت أياً منها القيمة وحده، لكن لو قلنا ١٠٦ على الشجرة وقتها هالقرار بيكون مربح لك وانتظار السنة يسوى! طيب لو بنتظر سنتين؟ ثلاثة؟ أو اربع؟ أكيد القيمة راح تزيد لكن وش سبب هالزيادة؟

• سببها يرجع لأن الفائدة تتراكم لأنها تؤخذ على المبلغ الأساسي+الفائدة المكتسبة بالفترات السابقة وأيضًا زيادة المدة بتزيد من المخاطر اللي ممكن تواجهك هالفترة وزي ما احنا نعرف مخاطر أكبر يعني عائد أكبر! طيب لو عملية التراكم صارت أكثر من مرة بالسنة؟ سواء بشكل نصف،ربع سنوي أو حتى شهري؟

• التراكم المتكرر بيزيد من معدل الفائدة الفعلية يعني ١٠٠ ريال اليوم بفائدة تحسب على أساس شهري بتعطيني قيمة مستقبلية أكبر من لو كانت الفائدة نصف سنوية وهكذا، قياسًا على الكلام اللي فات نقدر نوجد القيمة الحالية لقيمة مستقبلية بالعكس بالضبط وهو أني استخدم معدل خصم لحساب قيمتها اليوم

• مفهوم القيمة الزمنية للنقود يستخدم في حساب أغلب المعاملات اليومية في حياتنا مثل الفوائد البنكية،بطاقات الائتمان،أسعار المنازل و السلع وحتى التخطيط للتقاعد و بناء الثروات! أعرف قيمة ريالك وأستغلها