تدور احداث قصة Resident Evil 2 Remake في مدينة الراكون اللي انتشر بها فايرس خطر يقتل البشر ويحولهم الى زومبي .

اللي تسبب في المشكلة هاذي مشروع شركة امبريلا كانت تسوق لمشروعها على انه يعدل جينات الانسان للافضل , لكن بالحقيقه

هو سلاح بايولجي , تتكون الأسلحة البيولوجية من : مكونات بكتيرية سامة أو سموم بكتيرية وتعتبر خطورتها في انتشارها .

وتعتبر أخطرها هي الجدري والجمرة الخبيثة والسرطان وتعمل على حرق الإنسان وتشويه جسده وهو من أخطر الأسلحة

الموجودة على وجه الأرض إلى الآن , حيث أنه فاق السلاح النووي في الحروب من حيث القوة التدميرية والآثار المترتبة عليه بشريا

وماديا , طبعا بالجزء هاذا في شخصيتين ليون وكلير يمديك تختار بينهم وتلعب , لازم انك تلعب قصة الشخصيتين عشان تتركب معك

القصة وتفهمها ولازم تقرا المذكرات والملاحظات عشان تفهم القصة 100%, لازم تلعب بالشخصيات وتقراء المذكرات والملاحظات .

عشان تختم قصة ليون تحتاج من 10 ساعات الى 15 ساعه بالكثير , ولاتستعجل بالتختيم استكشف ومخمخ براحتك

عشان تختم قصة كلير تحتاج من 10 ساعات الى 15 ساعه بالكثير , يعني اذا بتختم الشخصيتين راح تحتاج من 20 ساعه

الى 30 ساعه بالكثير , قصة كلير كانت تبحث عن اخوها كريس وبعدها بفتره قريبه صارت احداث الفايروس والزومبي وبطريقها

قابلت ليون كندي واللي هو ظابط مستجد وتبداء قصتهم من هنا .

اللعبة نظامها زومبي والبقاء على قيد الحياة منظور شخصي ثالث.

وش منظور شخصي الثالث ؟؟ هو انك راح تشوف الشخصيه قدامك طول الوقت , طبعا اللعبه هاذي ريميك للجزء الثاني اللي نزل

على بلاستيشن ون قبل 21 سنة تقريبا, واللي لعبوها على سوني ون ولعبو الريميك هاذا راح يشوفون تغير بنسبة 90% كل شي

افضل بمراحل كبيرة, انت متخيل انها نزلت قبل 21 سنه بعدين سوو لها ريميك واللي هو اعادة انتاج اللعبه من الصفر.

عندك نمط واحد للعب اللي هو البحث والاستكشاف , احسن شي باللعبه انها ماتساعدك بالمره يعني انت لازم تبحث عن طريقك وتحل

الالغاز من اجتهادك , بالنسبة للقتال يعتمد على اختيارك للاسلحة .

واكثير رهيب ان يميدك تضيف قطعه للسلاح تخليه قوي وافضل , واختيارك للسلاح يعتمد على العدو اللي قدامك , وبرضو كل شخصيه

تختلف اسلحتها حاول بقدر الامكان تجمع الاسلحة كلها ولو شنطتك فلل او ماعندك مساحة تروح للصندوق الكبير وتحط الاسلحة اللي

ماراح تستخدمها او الاغراض اللي ماتحتاجها بالمنطقة هاذي .

طيب بالنسبة للاسلحة اللي موجوده باللعبة 23 سلاح و13 نوع وكل نوع له وقت ومنطقة تستخدمه .

-1 الفرد في كثير منه -2 السكين -3 القنابل -4 الفلاش -5الشتقن -6الرشاش الصغير -7قاذف القنابل -8الماقنم

-9سلاح الهاك -10 سلاح قاذف اللهب -11سلاح الكهرب -12سلاح المشينقن -13قاذف الصواريخ

طبعا ضرر السلاح يعتمد على المكان اللي راح تطلق عليه ونوع العدو اللي قدامك مثلا:

الفرد من طلقة وحده الى 30 طلقة عشان تفجر راس الزومبي الشتقن من طلقه وحده ينفجر الماقنم يذبح الزومبي على طول حتى لو

ماطلقة على راسه

الاعداء اللي راح تواجههم باللعبة هم

البشر: وهم اكثر الاعداء اللي موجودين باللعبة

الكلاب : راح تحصلهم باللعبة بشكل قليل جدا

الوحوش والمخلوقات الغريبه : وهم من اجمل الاعداء اللى راح تواجههم باللعبة وانواعهم كثيرة

الشي الجميل والممتع ان اللعبة تحسسك انك ضايع وماتسترشدك يعني انت بنفسك استكشف واكمل القصه.

والالغاز اللي باللعبة كثيرة طبعا في اللغاز لازم تحلها عشان تتقدم بالقصه وفي اللغاز جانبية , بس عليها جوائز جدا رهيبه وتساعدك

باللعبة مثل اذا حليت لغز الخزنه راح يعطونك قطعه تضيفها على السلاح , وعندك برضو ابواب جانبيه اذا فتحتها راح تحصل قطعه

القطعه هاذي تفتح لك باب به سلاح قوي جداا , للمعلوميه ترى الالغاز موجود حلها بالمذكرات او الملاحظات وحتى وانت ماتعرف

انقليزي راح تحلها , والله سهله جداا بس لازم تستكشف وتشغل مخك واذا ماعرفت حل الالغاز شف مقطع اللي نزلته حق 15 نصيحه

رابطه بالوصف

المفاتيح تفتح لك اكثر من باب , وفي معلومه اي غرض عندك ماعليه علامة صح يعني باقي له استخدامات مثل مفتاح الباب

يفتح لك ثلاث بيبان وبعدها يطلع علامة صح , معناته ان هالمفتاح فتح لك جميع الاقفال اللي يحتاجها المفتاح هاذا , يعني ماراح

تحصل قفل للمفتاح هاذا , وفي انواع كثيره من الاغراض فيه اللي تستخدمه مره وحده وفيه اكثر من مره .

انصحك وبكل قوه تستكشف والله في اشياء رهيبه جدا جدا ماراح تشوفها الا اذا استكشفت باللعبه .

اذا ختمت اللعبة اول مره راح يطلع لك خيار اسمه نيو قيم 2ND وختمته راح يطلع لك طور الاكسترا موود بشخصيات جديده .

ولاننسى ان اللعبه تنزل لها اضافات مجانية وتكلمت عن اول اضافة بتنزل واذا في اضافات ثانية رح اتكلم عنها اول مايعلنون .

الرسومات والجرافيكس وبكل امانه باللعبة جدا رهيب .

قد تلاحظ بان رسومات الزومبي من بعيد ضعيفه او اقل لاكن لاتحاف هاذي اللعبه توها نزلت وراح ينزل لها تحديثات تعدل من الشيء

اللعبه راح تتحسن بشكل رهيب ومع صدور التحديثات وممكن مع صدور المقطع نزل تحديث عدل الخطاء هاذا .

ولازم تعرف ان كل منطقة تتميز ببيئتها الخاصه واجواها ورسوماتها للامانه انا اللعب سوني4 برو وشاشه فوركيه ومشغل HDR .

وواضحه عندى الالوان والاضائه جدا جدا رهيبه والله ياجماعه عندي ثلاث شاشات وحده حقت الكمبيوتر ووحده 24 بوصه حقت

السوني قديمه جدا , وشاشه 55 بوصه فوركيه HDR من سوني , الفوركيه ماستفدت منه اللي استفدت منه هو HDR يوضح لك

الالوان والاضائه بشكل رهيب وواضح , والله فرق كبير بالالوان ولاتحسبوني اجامل انا شاشتي سوني صحيح انها غاليه بس قسم بالله

جودة رهيبه , واذا عندك الاكس بوكس اكس راح تشوف جودة افضل مننا بكثير وفرق واضح

قبل اتكلم عن السلبيات في شي لازم تعرفه ان السلبيات راح ينزلون لها تحديث وممكن مع صدور هالمقطع نزل تحديث عدل الاخطاء

اللي راح اقولها , ومع الوقت تصير اللعبه خاليه من الاخطاء والسلبيات للمعلوميه سلبيات اللعبه جدا قليله .

نبداء بالسلبيات :

-1 الايم باللعبة او التصويب :

الايم باللعبة من اكثر السلبيات اللي تقهر لازم تأييم ثلاث ثواني عشان الايم يصغر لدرجه ان العدو مابينك وبينه الا ثلاث امتار, وتطلق

على راسه اغلب الطلقات تضيع انا مدرى ليه يسوون كذا , خل العدوى قوي بس لاتخلي الايم صعب وحتى وانت مشغل الايم اسست

اللي هو مساعدة بالتصويب راح تواجه مشكله , حقين البي سي ماراح تواجههم المشكله هاذي بس حقين الكونسل .

المشكله ان اغلب الوحوش في مكان معين لازم تطلق عليه عشان يموت بسرعه خل الايم رهيب وقلل اطلاق اوكك , اما ايم سيئ

واطلاق قليله ماينفع , اللحين يجي واحد يقول عشان الرعب لا ماله دخل عندك الجزء الرابع والخامس والسادس الايم جدا رهيب .

-2 مافي موسيقى:

تخيل ان اللعبة 90% مافيها موسيقى حتى المشاهد السينمائيه , والموسيقى مع الرعب راح يضيف رعب زياده وتكون له طابع جميل

يبغونك تشتري الديلوكس عشان تستمع للموسيقي الاصليه والمفروض انهم يوفرونها بالنسخه العاديه لانها ريميك .

يارجل حتى الالعاب النسخه العادية بها موسيقى واكثر شي قهرني ان لما تشتغل اللعبه وتجيك شاشه اللي يقول رزدنت ايفيل2

ماهي موجوده , صرت انا كل ما ابداء اللعبه اقولها والله شي يقهر واحنا متعودين عليها .

-3الشخصية جدا جدا ثقيله وبطيئه :

لو قدامك عدو بينك وبينه مترين وتبغا ترجع وراء وتنحاش مايمديك , الكامره يبغاله ثانيه على بال ماتلف وعلى بال مايركض ركضته

الخايسه يبغاله ثانيه الا وهو ماسكك , انا ماعندي مشكله بركضت البنات بس ليه الشخصيه ثقيله حيل لدرجه ان الاعداء يمشون

شوي شوي وانت تركض يلحقونك بكل سهوله , ملاحظة : هاذي السلبيات من تجربتي الشخصيه .

الخلاصة:

للامانة واخيرا في لعبة تختيم ادمنتها لدرجه اني ختمتها اكثر من 10 مرات ولعبة 60 ساعه , اخر لعبة تختيم استمتعت بيها وختمتها

كثير هي انتشارتد 4 , والان رزدنت ايفيل2 ريميك لعبة جدا رهيبه وقدمت شي رائع ومذهل , وبرضو لما تختم اللعبه في اشياء كثيره

تسويها مثلا , تخلص التحديات وتلعب اكسترا مود ومن غير الاضافه المجانيه اللي بعد اسبوعين تقريبا بتنزل راح تضيف ثلاث قصص

هاذي اللعبه ادمنتها والله بشكل ماتتصوورون , لدرجه جبت البلاتينيوم بخمس ايام ولما جبت البلات اللعب بيها يعني ماشبعت منها .

اللي يحب اللعاب الرعب او الزومبي او سلسلة رزدنت ايفيل او البقاء او الالغاز او الغموض .

انصحه بيها ,لاكن اذا ماتحب ولانوع من الانواع هاذي ما انصحك تشتريها ابداا ..

التقييم هو : 9.2/10

طبعا هاذي مراجعتي الكامله للعبة اتمنى اني غطيت لكم كل شي يخص اللعبه , طبعا نزلت الكثير من الشروحات ولازلت انزل والاخبار

عن اللعبة , تجدونها بققناتي باليوتيوب

بالنهاية قرار شراء اللعبة يرجع بالاخير لك انت .

بالنسبة للي ختم اللعبه وحللها اكتب لنا كم ساعه لعبة ورايك عنها بدون حرق للاحداث عشان اللي ما شترى اللعبه يستفيد من تعليقك

يعطيكم العافيه على المشاهده ولاتنسون مشاركة الفيديو لاخوياكم وزر اللايك المقاطع الجايه راح تكون شروحات عن اللعبة .

اذا عندك استفسار او سؤؤل اكتبه تحت بالتعليقات وباذن الله ارد عليه باقرب وقت .

وسلام عليكم...