مقدمة ونظارات نحتاج نلبسها قبل لا نبدأ:

العمل مع الشباب .. مصطلح صعب شوي لأننا ما تعودنا عليه، لكن لو نركز نلاقيه موجود – ممكن بطريقة عشوائية و بجودة ضعيفة أحيانا تحتاج تطوير لكنه موجود - في كل مكان فهو مدرسك اللي كان يعلمك وينصحك عن الحياة وهو الكوتش اللي يجلس معاك ويشاركك التفكير في أفضل مسار وكيف تكون متوازن في حياتك وهو المرشد الطلابي اللي مفترض يكون أبوك الناصح اللي يسمع لمشاكلك وينصحك ويساعدك عشان تجربتك التعليمية في المدرسة تطلع بطلة ،

باختصار شديد هو أي شخص مؤهل يعمل مع الشباب لجعل جودة حياتهم أفضل .. وهذي الأمور حلوة تاخذها بباسطتها لا تعقّدها وتعيش عمرك كله تدوّر تعريف.

وعلى فكرة ، الشباب غير الكبار .. تحدياتهم مختلفة وأفكارهم مختلفة وطرق تعلمهم مختلفة ! فالمشكلة الأزلية هي يوم تكلم الشاب زي ما تكلم الكبار .. ما نقصد هنا إن الشباب أقل من الكبار لكن زي الفرق بين الرجل والمرأة والشاب والطفل والفرق بين الجنسيات المختلفة .. ما يفكرون زي بعض رغم وجود مشتركات كثيرة !

وفي سياق آخر ،سهل نتكلم عن القيادة للكبار ، لكن القيادة للشباب – 13 الى 18 سنة – صعب تلاقي فيها مراجع أو مؤلفات .. و جزء من رسالتنا نغير الموضوع ذا

للأمانة .. وقفة شكر لشباب مجتمعي لأنهم شغالين على الملف ذا بشكل فنان .. ونحتاج أكثر وأكثر ل مجتمعنا السعودي البطل اللي رايح أبعد مع رؤية 2030 واهتمامها بالشباب ، واحنا جينا نضيف نكهتنا العملية على النظريات العلمية في ذا الموضوع.

هذي كم نظارة تشوف الموضوع من خلالها عشان تفهم الجاي أكثر !

الهبرة والزبدة وصلب الموضوع :

راح نذكر اليوم ستة نصايح طلعناها من بطون الكتب والدراسات وبطون تجارب العاملين في غمار

1. حط خطط مع الشباب لكن خلك مرن !

الشباب بشكل عام في مرحلة اكتشاف ذواتهم ووين رايحين ووش وده يصير فلا تشدها معاهم وخليك مرن ، ممكن في لحظة يقرر يغير شغفه أو يقرر الابتعاد عن إكمال خطته ، تقبل الموضوع وسانده دايما !

2. مب لازم يطلع زيك !

وهذي النصيحة سهلة تنقال ولكن تطبيقها صعب خصوصا للأهالي أو الإخوان الكبار ، ببساطة لا تدف شخصيتك وقناعاتك وتفضيلاتك على الشاب ! انت طبيب وهو لازم يصير طبيب !

اعرف إن التأثير أحيانا يكون عكسي إذا شديتها ، وهو راح يتعب وانت راح تتعب ! خلي الشاب يقرر ويكون نفسه وانت عليك النصيحة والتوجيه.

3. اصحك تطيح في فخ اللي يقول (سو\سوي زي ما أقول وخلك من تصرفاتي !)

كل الدراسات للكبار والشباب والصغار تقول إن الناس تتأثر بالقدوة أكثر من الكلام ، ومصداقها الحبيب صلى الله عليه وسلم قول وفعل!

بشر يتألم ويحب زينا ، وربي ما أنزل ملَك ما يشاركنا الجوع والألم أو عنده ممكّنات غير اللي عندنا .. عشان يكون حجة لنا ونتشجع نكون زيه.

و ترى النصايح سهلة وتفقد قوتها بمجرد إنها تفقد مصداقيتها ، إذا ما كنت تسوي اللي تقوله فراح يفهم الشاب إن اللي تقوله مثاليات بس ..

ولو كان صحيح وعملي ، كان سويته انت !

وعلى طاري المثاليات ، ومن جهة أخرى ، نادرا جدا إن الإنسان يسوي كل شي يقوله !

طيب حيرتنا وش نسوي يعني ؟

الحل ويمكن ما يعجبك ،هو إنك تحاول قدر المستطاع إنك تتمثل أقوالك وتخلي هذا الغالب، عشان نفسك أولا، ثم عشان الآخرين ! ولا يمنع تنصح بالأمور اللي ما قدرت تسويها ، محد كامل يا صديقي ..

4. خلك ممكن !

الشاب عنده طاقة تخليه يلعب كورة في الظهر ثلاث ساعات في نص شهر 7 ميلادي ( يعني في عز الصيف ) فلا تعامله زي الكبار اللي ما ودي أقول كسلانين لكن أقل نشاطا من الشباب عشان لا يزعلون..

المهم الطاقة ذي تحتاج توجيه ! وتحتاج تحفيز وتحتاج إنك تفتح له الفرص يجرب ويخاطر أحيانا .. لا تخلي الخوف يفوز عليك دايما ورغبتك في إنه يكون آمن تخليك تمنعه يجرب وينطلق .. بيكبر ويزعل عليك سواء كنت أبوه أو أمه أو موجه له في أي مكان، وشخصيته قد تصير ضعيفة لذا السبب .. وهنا ممكن يكون الحل هو التجارب الآمنة اللي يتبعها نقاش وسوالف عن القناعات ووش الصح ووش الخطأ .. هنا يتعلم بدون ما يكون فيه خطر كبير عليه !!

5. جلدك خليه ثقيل!

العمل مع الشباب له لحظات تخليك تقول يا ربي لك الحمد هذا الأثر اللي أبغاه ، وتخليه يوم يكبر يحفظلك الفضل ويبر فيك إن كنت أخوه أو أبوه أو حتى مدرسه !

لكن فيه لحظات تخليك تفقد الأمل وتقول أنا وش قاعد أسوي ؟  ليش أضيع وقتي ؟ أنا مرشد طلابي أستلم راتبي سواء صنعت أثر أو جلست آكل بيض جبن .. أنا موجّه أ كوتش راح أستلم فلوس الجلسة سواء صار شي ولا لا ، وبعدها أرجع آكل بيض جبن زي المرشد ..

اعرف يا صديقي إن الرحلة زي الأفعوانية ( قطار الموت ) في الملاهي فيها فوق وتحت وفيها قلبات بعد .. خلك صبور ،اللي بين يديك وزراء وقادة المملكةالمستقبليين ! وواجبك الوطني والديني إنك تصبر !

6. العمل مع الشباب ما هو سوبرماني .. هو باوررينجرز شوي

مشكلة البعض إنه يتخيل إنه سوبرمان .. لحاله راح يدافع عن كوكب الأرض ، لا يا حبيبي إنت جزء من المجتمع اللي يأثر فلا تشدها .. واحنا في عصر يقدر الولد يجلس مع إلون ماسك ويسمع أفكاره من خلال اليوتيوب .. ويجلس مع الصالح والطالح.

فدورك إنك تكون ممكّن وموجّه ومفتاح للأبواب الطيّبة عشان يبني الشاب قناعاته ومهاراته وقيمه صح !