بعطيكم إياها كنقاط، وش الأشياء الي إذا حطيتها بالcv بتصير أحسن من غيرك بشكل نسبي .

- تتوظف بمجالك

أقصد بالهندسة أو بتخصصك بشكل عام طبعاً "علاقات" وأنت وشطارتك .

- إذا ما قدرت تتوظف بالنسبة لمجالك، حاول أقل شيء تروح لمجال يدعم مجالك، مثلاً: الهندسة وشو أكثر شيء يدعمها ؟ الإدارة وهكذا حسب تخصصك .

- تتوظف لكن بغير مجالك “ مطاعم مقاهي الخ “ .

- أول ما توصل السنة الثالثة قدم على برنامج أرامكو “الرابط تحت “ .

-المنح , اذا كنت من سكان الخليج بشكل عام فحاول تقدم على الشركات الي تقدم

منح مثلاً هيئه كهرباء والمياه دبي (ديوا) اذا تبي تقدم عليهم من هنا

وغيرها الكثير .

- تاخذ تدريبات بمجالك كيف ؟

مثلاً عندنا بجامعة الملك سعود تروح قسم التدريب وتاخذ خطاب وتدور شركات تقبلك بشرط يكون عندك وقت أصلاً في الترم الصيفي أو الأترام العادية .

- الطلاب الي معدلاتهم عالية يقدرون ياخذون تدريب برا السعودية، طبعاً بعد اجتياز المقابلة الشخصية .

- الصيفيات خلال حياتك الجامعية

أنت تمر بأربع صيفيات وش سويت فيهاا ؟ تقدر تاخذ بالصيف تدريب سواء بتخصصك ولا خارجه،

عن طريق موقع صيفي “الرابط تحت “ أو مسك “أيضًا الرابط تحت “

مسك تدريبهم جميل واحترافي وأنصح بشدة فيه خاصة إذا كان برا السعودية.

- تشتغل بالتجارة وركز على التجاره الإلكترونية بأي مجال أنت تحبه.

- النادي الجامعي

تسجل كعضو بعدين تترقى لين تمسك منصب معين، مثلًا: كقائد هذي تحسب لك.

- المشاركات مع الجامعة

مثلاً: عندنا مشروع الغزال في كل سنة ياخذون طلاب جدد ويضمونهم للمشروع ويبدون يتعلمون، أغلب الجامعات فيها مشاريع .

- البحوث العلمية أو الدراسات

حاول تبحث وتشوف ممكن تشارك الدكتور فيها.

- براءات الاختراع بجميع أفكارها .

- الاختبارات المهنية , مثل FE .

-اختبار CAPM.

- الشغف

كيف ؟؟ تخيل نفسك تحب التصميم وجبت درجات حلوة فيه، وش تنتظر خذ كورسات أقوى داخل ولا خارج الجامعة أو حتى أونلاين، تتخرج وأنت فاهم المسار هذا بالتالي لو قدمت على شركات تحتاج مصمم أنت أول واحد يرشحونك؛ لأن عندك الكورسات والدورات الي بتخليك تجاوب على كل الأسئلة في المقابلة .

- الأعمال التطوعية

- Exchange "تدرس ترم خارج السعودية".

طيب آخر نقطتين بعد ما تقرأ بتقول ماهي FE وCAPM .

‏اولاً ال FE ,

هو اختبار بعد ما تخلص الهندسة مثل التحصيلي ممكن تختبر على أساسيات الهندسة وإذا جيت تشتغل برا السعودية مثلاً لازم تكون مجتازة، الاختبار نجاح ورسوب فقط ونسبة النجاح تعتمد على الدفعة، إذا الآفرج عالي ترتفع نسبة النجاح، طبعاً ممكن تختبره قبل تتخرج بترم أو بعد، مشكلته ممكن سعره شوي غالي طبعاً شيكو على هيئة المهندسين حاطين لكم معلومات أكثر عنه وفيه مراجع قبل تدخل الاختبار لو ودك تراجع يعني “أيضًا رابط موقعهم تحت “.

ثانياً ,

Certified Associate in Project Managemen=CAPM

مشارك معتمد في إدارة المشاريع , اذا كنت مهتم في اداره المشاريع والشهادات المهنية ف CAPM هي الطريق الاول لها , شروطها بسيطة

شهادة ثانوية مع 1500 ساعه خبره او , شهادة جامعية مع دورة يقدمها معهد PMI, مشكلة الدوره غالية شوي سعرها لاعضاء PMI ب350$ وغير الاعضاء ب 400$

بعد ما تستوفي الشروط تصبح مؤهل لدخول للاختبار .

اذا تبي تقدم على الاختبار من هنا .

طبعاً الشهادات المهنية بحر والمهندس عبد الرحمن شارح اغلب واهم الشهادات المهنية تجدون التغريدة في الاسفل .

بالأخير أنت منتج كيف تقدر تطور نفسك ؟

انتبه تقول ماعندي وقت وأنا مب فاضي،انظر لطلاب الي حولك والله بتحصل طلاب يسوون أشياء جميلة وقوية،الي يبي يطور نفسه بيطورها بغض النظر عن أي شيء.