مذكرات الاربعاء ٤

مع مين اتكلم؟

عيدكم سعيدبعد العيد

وعارفة طولت الاجازة بس اش اسوي الدنيا عيد وربنا يعلم بالاحوال والانشغالات…

على قد ما حاولت التزم ما قدرت…فاعزروني اسفة🙆‍♀️

تتعلمي صيني…طب تكلمي مين؟

بعد ما اتعلمت مجموعة لا بأس بها من الكلمات والجمل سار لازم ادور احد امارس معاه اللي اتعلمته…مع شخص مهتم مو حاسس اني باضيع وقتي او يتريق عليا…

قلتلكم قبل انو اغلب اهلي ما كانوا مشجعين؟!!

مع هدا افتكر اختي الكبيرة كانت تدرس انجلش في (الإي إف) وبعد ما يخلصوا الدرس مع الاستاذ كان يعطيهم الامكانية يتكلموا مع بعض في اي موضوع مع اي شخص حابين في الكلاس… كان في وحدة صينية معاها تتعلم انجلش فكلمتها تتكلم معايا…

وفعلاً جلسنا فترة نتكلم في تطبيق الويتشات بس بعد فترة سحبت عليا🤷‍♀️


بعدها سرت ابحث عن اشخاص صينيين في تطبيقات الجوال واتوقع كان في فترة ٢٠١٢-٢٠١٣ وحدة نصحتني بتطبيق (هلو تاك) وفعلاً لقيت اكثرمن شخص بيتعلمو عربي وهما صينيين لكن للاسف اغلبهم اولاد ومو حقين تعلم بس ضياع وقت✖…فعلى طول اسحب عليهم الين لقيت صديقتي الصينية اللي انا اعرفها من عام ٢٠١٣ واسمها نتاشا💗مازلنا صديقات الى اليوم ومعايا في كل الاحداث والاشياء اللي سارت في حياتي واستشرتها في اشياء كتير وعلمتني وساعدتني كتير بالنسبة للغة الصينية..

كنا نتكلم في اي موضوع وفترتها كنت احاول اتقن القواعد والكتابة بالجوال فنشوف موضوع ونتكلم فيه وازا غلطت في الكتابة او في قاعدة واحنا بنتكلم ما ترد عليا الا لما تعدلي خطأي بعدها نرجع نكمل.


عشان كده للان انا في الكتابة بالجوال جداً متقدمة والفضل لربنا ثم صديقتي الصدوقة اللي اتمنى اقابلها وجهاً لوجه في يوم من الايام.


مهما تكتب كتير ابدا مو زي لما تقابل شخص وتتكلم معاه منها فعلا تعرف نقاط الضعف عندك لاني كنت دايما اعتقد اني كويسة في النطق الين قابلت وحدة صيينية جات في رحلة عمل مع طاقم معاها للرياض لما كلمتهم قالوا واو لغتك تعتبر كويسة لكن…

لما كنت اتكلم مع واحد منهم كنا نتعزب واحنا نحاول نفهم بعض الكلمات لكن لما هيا تعيد لي نفس الكلام اللي قالوا عادي افهم يمكن بسبب اختلاف اللهجات

ويمكن لاننا حريم بنفهم بعض😏…امزح

بس كان كلامها واضح وبطيء وكان بالها وسيع لما انا اتكلم طبعاً بصينيتي المكسرة كانت تصلح لي وتستنى عليا، افتكر كنا بنتكلم في موضوع وجات سيرة شركات كنت ابغا اقول شركة✅(公司) قونغ سي gōng sī لكن انا نطقتها راتب❌(工资) قونغ زي gōng zī 😅 كان موقف محرج لانه طبعاً اول مرة نتقابل وفجأة ندخل في موضوع راتب فاستغربت انا انها مستغربة!

بس بعدها عرفت انا اش اقصد فصلحت لي نطقي وعادي عدا الموقف على خير لكن لليوم مستحيل انسى الكلمتين هدول.

ومنها انتبهت انه لااازم اركز عالنطق وما اعتمد على تعلمي الشخصي

النطق بالذات لازم يكون في معلم او شخص لغته الام هو اللي يركز لك عليه…

فبدأت بعدها مهمة البحث عن مركز او معهد او معلم ادرس على يده ولقيت اخيرا في ٢٠١٨😪خلي قصة المعهد دا ليوم تاني…

فنصيحة اليوم ازا بتتعلموا لغة وتبغوا تتقنوها دوروا شخص يساعدكم تتحسنوا ويهتم بمدى تقدمكم…زي صديقتي نتاشا💗


وبس…دمتم بود👋



اي ملاحظات انبسط اعرفها💖

Join