مذكرات مع اللغة الصينة٢

ازاكر حاسب ولا صيني؟!

تخصصي الجامعي زي ما انتو عارفين…علوم حاسب😎بس محد ساحب عليه دحين🙄

المهم نعود بالذاكرة لعام٢٠١١ المستوى الثاني كنت ديك الفترة في اوج انشغالي وشغفي بتعلم الصيني فعلى قد ما التخصص بيتعمق على قد ما انا بالي مشغول كيف اتعلم صيني بسرعة…

دراما صينية vs تصميم المنطق الرقمي


قلتلكم قبل اني احب مادة تصميم المنطق الرقمي مع اني جايبة فيها ابو العيد بس يمكن لانه لها علاقة مع بدايات تعلمي للغة الصينية…احبها والين دحين ومحتفظة بكتابها وملفاتها.

في المستوى التاني كنت ادرسها وسبحان الله في نفس فترة اختباراتها طحت على دراما صينية تاريخية مدري ليش فجأة خلاص وقعت في حبها وسرت اتابعها وهيا تنزل (معلومة بالنسبة للدرامات الصينية: حلقاتها كتييرة وينزلو حلقتين في اليوم😌) المهم كنت اتابعها اول بأول لا وياريتني فاهمة الدراما، اولاً مستوايا كان مرة مبتدئ تانياً كانت دراما تاريخية يعني الوضع اصعب. والمشكلة طبيعتي اني مستحييل اتفرج الشي كامل بدون ما اقدم في المقاطع او ممكن ابدأ بالحلقة السابعة بعدين ارجع للحلقة الاولى مثلا!! بس سبحان الله كنت مرة مهتمة بيها وفرررحت لما لقيتها بتترجم انجلش… وهنا انا خلاص سرت ادمان.

جاء يوم اختبار مادة التصميم (وحبكت تنزل حلقات كتير للدراما يعني اتفرج على كيف كيفي) كنت اذاكر اذاكر بعدين اعطي نفسي بريك مطول اتفرج عالدراما هادي الين احس بتأنيب الضمير وارجع اذاكر….

في الاختبار…مو جبت العيد…جبت اللي بعده🎉 (طبعاً جيبت العيد كان لها اسباب تانية كمان 😗بس ديك الدراما وحدة منها).

الدراما اتفرجتها صيني وانجلش ولما اترجمت عربي اتفرجتها تاني لا وشكرت المترجمة وكنت لها من الداعمين.

اللي يضحك في الموضوع انه بعد كم سنة لما ارجع اشوف لها مقاطع اضحك على نفسي يعني كنت اقدر انتظر كم يوم واشوفها ما حتشرد الدراما😂لكنها مرررة احلوّت وقت هداك الاختبار وترا مو من كتر ما هيا بيرفكت فيها اشياء عبيطة وتضحك واشياء كتير ما افضلها ولا هي نوعي، بس يمكن لانها مختلفة وجديدة بالنسبالي…لكني برضي للان احبها واحب ذكرياتي معاها.

وكان مو بس فرجة الدرامات اللي تشغلني..حتى التسجيلات و الفيديوهات اللي حافظتها على جوالي، والله اسمع لها واهتم بيها اكتر من محاضراتي (ومذاكرتي😀) كنت لما القى بريك او بعد الصلاة اجلس في المصلى واسمع واركز ويمكن اقول معاه بصوت عالي🙊 اذكر يوم بنت اعرفها كانت بتصلي قدامي خلصت الصلاة وجات قربت تطل في جوالي قالت لي هدى ايش بتسوي!! قلتلها باتعلم صيني سكتت شوية بعدين قالت الله يوفقك وهيا مرة مستغربة …بس لما ارجع بذاكرتي اتوقع انها سمعتني باقول معاه او شي بصوت مسموع وكلام عجيب لدرجة انها انتبهت…لانها مو من النوع الملقوف لدرجة تجي تطالع في جوالي كمان😂😅

بس بعد هداك الاختبار والمعدل اللي حصل بسبب الصيني قررت انه خلاص لازم اهدي اللعب💔…وسرت السنوات اللي بعدها الين تخرجي في ٢٠١٤ مركزة اكتر على دراستي… ما سبت الصيني لكن اهتميت بالتخصص مرررررة أكتر.

وبس…اختم كدة بمقولة تمثلني لما كنت اذاكر…

xīn bù zài yān 心不在焉 (شين بو زاي يان)

وتتقال للواحد اللي يسوي الشي بس عقلو مو معاه🤯…


اراءكم تسعدني❤

Join