تعلم البرمجة في 7 ايام
اهلاً ! كثير ما نسمع هالأيام هذه العبارات الرنانة مثل “ تعلم البرمجة في اسبوع او تعلم التصميم في 24 ساعة ! “
عبارات طبيعية تتواكب مع وقتنا الحالي كل شيء سريع وكل الناس تبغا توصل بسرعه ولكن هذه العبارات غير صحيحة ولا تتماشى مع شخص مبتدئ لا يمتلك ادنئ معرفة بالحاسب .
لا يمكن للمرء أن يحصل على المعرفة إلا بعد أن يتعلم كيف يفكر
فكر! هل صحيح المدة القصيرة راح تطلعني محترف؟ او متوسط الخبرة؟ طبعا لا انت تحتاج فترة طويلة من التجريب والأخطاء والاسئلة عشان توصل . لا تنجر لهذه الكلمات وتبني عليها احلامك , صحيح حتساعدك تتشجع للتعلم كون ان المدة قصيرة وراح تتحمس للهذا المجال ولكن لا تزعل اذا بعد هالمدة إكتشفت انك لسه ماتعرف شيء.
السبعة أيام ممكن تصنع لك أساسيات بسيطة جداً عن لغة معينه من حيث اللوب , if else .. الخ ولكن طريقة كتابة كود طويل ما اعتقد, تحتاج اكثر من 7 ايام وتحتاج تغلط وتبحث وتسأل عشان توصل . ( انت تحتاج أكثر من ايام محدوده عشان تكون قاعدة من الأساس تكون قوية ترفع سقف شغفك وعلمك ).
طيب كيف اتعلم البرمجة؟
في البداية لازم نفهم ان البرمجة ماهي مقتصره على شخص معين كل مين يقدر يتعلم ويشوف إذا هالمكان شغفه ويقدر يعطي الناس فيه أو لا .
لذلك قبل تتعلم برمجة لازم تعرف أيش يعني حاسب الي , الخورزميات و الحوسبة السحابية. - مو لازم تفصيلاً ولكن الخورزميات مهم تحط مجهودك عليها - السبب إن الخورزميه مثل المخطط التفصيلي عن المشروع ايش الأكواد اللي استخدمها وكيف الخطوات حتكون , فلما تبدأ انت فاهم كيف تكون طريقة كتابة الكود مراح تحس بالضياع .
بعد كذا تبدا:
تحدد مسارك :
عالم البرمجة كبير مو بس برنامج على موبايل . لذلك لازم تعرف انت ايش تبغا! تبغا برمجة تطبيقات IOS , Android ؟ او تبغا تطور تطبيقات الويب و صفحات الويب ؟ او……..الخ ( لازم تبحث انت عشان تجرب وتلقا شغفك )
ابحث واسأل عن خارطة الطريق :
بعد تحديد المسار هنا يجي دورك تكثف بحثك بخصوص هذا المسار . تسأل المختصين كيف كانت بدايتهم وايش المصادر والأدوات اللي استخدموها في بداية طريقهم . و عند البحث لازم تعرف تستخدم كلمات تعزز وتقوي عملية بحثك مثل “ RoadMap “ إستخدمها عند البحث الطريق الكامل لإحتراف مسارك . مثلاً انت شخص تبغا تطور تطبيقات IOS اذا في عملية البحث عن الطريق للبداية أكتب بقوقل : RoadMap for development IOS app حتطلع لك هذه النتيجة :
طبعاً مو كل اللي بهذه الصورة واجب عليك تتعلمه في أساسيات مهمة ومواضيع مهمة لازم تتطرق لها قبل تفكر تكتب بحسابك ( IOS developer ) .
الإنظباط:
أهم جزء بطريق تعلمك هو الإنضباط . مهما خططت بدون الإنضباط مراح تخلص .
ليش اليوم ننخدع بـ 7 ايام برمجة لان الفترة المحددة قصيرة وعقلك يتحمس , ولكن تخيل نص ساعه يومياً من الإنضباط والتعلم العميق كيف راح يفرق معاك بعد شهر !
مشروع صغير من مشكلة موجودة أخير من التقليد:
في كل مره انت تقرأ حتصادف مشكلة يحتاج لها حل من مسارك مثل سابقاً مشاكل توصيل الأكل , كنت بالبداية تطلب من المطعم و Delivery man ياخد اكثر من طلبية لكذا عميل فيوصلك الأكل بارد ولكن الأن في تطبيقات مخصصه لتوصيل الأكل وكل سائق يكون ملزم بعميل واحد فقط . لذلك إقرا وتعمق وحتصادف شيء بطريقك .
أخيراً , إنك تتعلم اساسيات شيء في مدة زمنية بسيطة حيخليك تواجهه امرين لا ثالث لهم :
1- مدة الدرس طويلة تتجاوز 30 دقيقه مع حشو هائل في كمية المعلومات لدرجة التشتت .
2- مدة الدرس مناسبة ولكن تجاوز كبير لـأهم المواضيع والأدوات .
لذلك إختارو كورسات طويلة أصحابها ما يؤمنو بمدة محددة ويعطيكم مراجع لبعد الدورة تطوركم وتزيد من خبرتكم بالمجال.
المدة القصيرة تعطيك أساسيات بسيطة ولكن لا تتوقع بعدها إنك جاهز تستلم مشاريع كبيرة والدليل لاحظ اذا احد اعطاك مشروع كيف تتوتر وماتعرف تبدا وكيف تتصرف لانك ماتعودت على الأخطاء والأكواد الطويلة .
“ إبداء صح وحتوصل لو بعد حين “ .