إذا كنت من الناس اللي يتشتّت أثناء عمله بالتنبيهات والرسائل، هذا التطبيق راح يمنعك من استخدام الموبايل فترة من الوقت عشان تركز على المهام اللي تشتغل عليها، وهو يعتبر من التطبيقات اللي تعتمد على تكنيك Pomodoro اللي يشجّع على تقسيم العمل إلى مهام صغيرة خلال فترات زمنية قصيرة، مع التركيز الكامل خلال هذه المدة وعدم التشتت بأي شيء آخر.

فكرة التطبيق بكل بساطة إنّ كل يوم يكون عندك أرض زراعية فاضية، راح تكون مقياس لانتاجيتك خلال اليوم. قبل لا تبدي بأي مهمة سواء كتابة، تصميم، برمجة، قراءة كتاب؛ تفتح التطبيق وتحدّد مدة زمنية لإنجاز هذي المهمة سواء كاملة أو جزء منها.

بعد ما تبدي راح يظهر لك عد تنازلي حسب الوقت اللي حددته، وخلال هالوقت ممنوع تطلع خارج التطبيق، ومجرد ما تطلع راح يرسل لك تنبيه إنك لازم ترجع، وخلال ثواني لو ما رجعت راح تموت الشجرة، ولو التزمت بعدم استخدامك للموبايل؛ بعد انتهاء المدة راح تلقى شجرة جديدة في مزرعتك بالإضافة إلى حصولك على عملات نقدية -coins- وكلما تنجز أكثر، راح تزرع أكثر، وتحصل على coins أكثر تقدر تشتري فيها أنواع جديدة من الأشجار لتزيين مزرعتك الخاصة.

التطبيق فيه تحديات، وتقدر تضيف أصدقائك، ويعطيك إحصائيات عن إنجازك. ومن أجمل المميزات إن لما يكون عندك رصيد معين، تقدر تزرع شجرة حقيقية في أفريقيا! -كنت جدًا سعيدة لما وصلت هذي المرحلة 🤩-

التطبيق يلعب على وتر إنه يحسسك إنك مسؤول عن شي، إذا ما أنجزت، شجرتك راح تموت، وشكل مزرعتك راح يصير مو حلو إذا كانت فاضية أو فيها شجر ميّت.

التطبيق متوفر للتحميل على آب ستور وقوقل بلاي.