في مجال التحسين لمحركات البحث SEO، مشكلة الشركات والأفراد إنهم كثير بحاولوا "يتحايلوا" على محرك البحث بطرق عديدة، نعم بتعطي نتائج مؤقتة، لكنها غير دائمة وآخرتها تنمسك.
أكبر موقع عربي بالعالم للأسف أكلها اليوم، كان يكتب ٦ و ٧ مقالات وأكثر عن نفس الموضوع عشان "يحتل" الصفحة الأولى على جوجل، كنت متأكد من مجيء هاليوم، قررت جوجل تعطي تنوع أكبر لصفحة النتائج وما تقتصر على موقع واحد.
ليش أنا مع التحديث؟ بكل بساطة ما بصير موقع يخلي كتاب ما بعرفوا اشي بالطب مثلا، يكتبوا مقالات تطلع نتائجها قبل موقع طبي متخصص كتب مقالاته أطباء مختصين.
طيب الأمور غير الطبية؟ المواقع الكبيرة قتلت مئات وآلاف المواقع الصغيرة (العامة والمتخصصة) اللي عملوها صحابها عشان يشتغلوا عالإنترنت ويحققوا دخل كانوا محرومين منه بسبب مواقع كبيرة استغلت ثغرات مثل هيك، وللأسف في مواقع مثل اليوم السابع بمصر كانت حرفيا تسرق مقالات من مواقع صغيرة وتطلع قبلهم على جوجل!
التحديث صار live، وفي كلمات كنت ألاقي عليها ٧ نتائج من موقع واحد، اليوم صاروا نتيجتين فقط، ولو ما ركزت المواقع على عوامل تجربة المستخدم UX Signals، رح تخسر كمان النتيجتين.
بتوقع الموقع الأكبر عربيا يتأثر بما لا يقل عن ٣٠-٤٠٪ من عدد زياراته خلال الفترة القادمة، وإن شاء الله يكون عندهم خطة لهيك يوم.