ذكرت قبل اني جلست فترة ادور معهد عشان ابغى احسن من مستوى النطق عندي، كنت ديك الفترة في الرياض وعلى المدة اللي قضيتها فيها من 2016 كنت ادور على معهد للصيني للاسف ما لقيت، المهم انشغلت فترتها باللغة الالمانية والدراسة والعمل الين في نهاية 2017 او بداية 2018 رحت الاسبوع الثقافي الصيني في مركز الملك فهد وانبسطت انه اخيرا شيء صيني.

مع انه ما كان بالتميز اللي كان في الاسبوع الثقافي الياباني الا انه كان مليان صينيين😍

على نهاية اليوم وانا واختي جالسين سمعت استاذتين بيتكلموا فاظن اختي قالت لي كلميهم واتشجعت ورحت كلمتهم ومرررة انبسطوا وسالوني فين اتعلمتى وكدة وحكيتهم قصتي مع الصيني فقالت ابلة عائشة احنا عندنا مركز لسه شغاليين عليه لو تجي عندنا

وكانت معاها ابلتي اللطيفة جدا ابلة مريم اعطتني رقمها وسبحان الله كان المركز قريب من مكان عملي…طبعا مو قريب قريب لانه مافي شيء قريب في الرياض🙄 لكن كان 12-15 دقيقة بالسيارة.

عموما بعدها بفترة لما لقيت وقت خرجت من الدوام ورحت ادور عالمركز وكان اسمه (yun Cultural Center) وفعلا قابلت الاستاذتين وشرحتلهم بقية قصتي وطلبت منها اني ادرس كتاب الاتش اس كي المستوى الرابع (اختي الكبيرة الله يسعدها اشترته ليا من فترة وخليته عندي ما زاكرت منه فقط اتصفحته) فقالت لي ابلة عائشة اول لازم تحديد مستوى! قلت مافي مشكلة وفعلا طلبت من وحدة من الاستاذات تختبرني فجابت الكتاب وقالت لي اقري عنوان الدرس الاول فقريته… صح مو كل النغمات كانت مزبوطة لكن القراءة تعتبر صحيحة وانبهرت الاستاذة قالت لا تمام يلا اقري هنا.. اقري هنا وانا قريت😀 واخر شي قالت لي فعلا ينفع تبدي في المستوى الرابع (سنينن الله بتعلم بس هي ما تدري😂)

والحمدلله حددنا وقت الدراسة والاستاذة كانت ابلة مريم😍 وكانت دروس خاصة لان المركز بدأ بالمستوى الاول لبقية الطلاب ووقتهم ما يناسبني اصلاً.

في 2018 كنت ادرس يومين في الاسبوع اثنين واربعاء لمدة ساعة ونص تقريبا وبتوصل ساعتين احيانا مع الحماس🙃 لكن كانت جدا ممتعة وابلة مريم بالها وسيع وفتحت عيوني على اشياء ما كنت ماخدة بالي منها واسياسيات كنت لسبب ما ساحبة عليها…(فعلا الدراسة في المعهد تختلف عن الدراسة الذاتية ولو ان الاتنين كلهم ممتعين).

العيب الوحيد اني كنت ادرس لوحدي انا والابلة بس!! والكتاب كان فيه انشطة جماعية احلى لو تكون مع مجموعة لكن مع هدا ما كانت تعديها ابلتي ونعملها احنا الاتنين بس.

جلست في المركز شهر واسبوعين خلصت تقريبا الكتاب الاول ووقفت لاني قررت اترك الرياض وارجع للمدينة لكن كان احلى مركز لغة دخلتوا في حياتي.. واتمنى كتير يعيشوا نفس تجربتي.

باقي مواقف كتير حصلت لي في المركز اشاركها معاكم في مذكرات تانية فنوقف هنا اليوم…