level up
كيف نطور مستوانا من دون ما نحس؟
اتكلمت قبل عن ملاحظة التقدم وكيف ممكن اعرف تقدمي في اللغة من اشياء قديمة كنت اتابعها وما افهم منها شي.
اليوم ابغى اتكلم عن اشياء ممكن نجربها ونتعلم منها بدون ما نحس اننا بنتعلم منها…يلا نبدأ
تطبيقات الشراء من الانترنت!
ومين ما يعرف علي اكسيبريس؟ واحد من التطبيقات اللي استخدمها اشتري اشياء تخص اللغة الصينية واشياء تانية كتيييير.
مع التحديثات اللي عملوها في التطبيق صار في عندهم بث من المحلات اللي يضمها بحيث اصحابها يسوقوا للمنتجات اللي يوفروها، صراحة فكرة مرة حلوة اني اتفرج عالسلعة وفي نفس الوقت اسمع البائع يتكلم عنها باللغة الصينية وبلهجات مختلفة…وهدي النقطة جدا تساعد على تقوية السماع وتمييز اللهجات ومعرفة نطق الكلمات بطرق مختلفة.
كمان ممكن لو عجبتكم سلعة تجربوا تتواصلوا مع البائع بالصيني حتى وان كان بجوجل للترجمة وحتى وان كان حينصدم في البداية ومايرد الا بالانجلش لكن حلو تجربو حاجة جديدة وانا عن نفسي جربت ولقيت تفاعل حلو.
المنتجات اللي حولنا :)
طبعاً ما حنقدر نعدد كم من الاشياء اللي حولنا … منتجات مصنعة في الصين! لكن نقدر نقرا اللي مكتوب عليها ونتعلم كلمات ومصطلحات جديدة ومتعلقة بالشي اللي اشتريناه وممكن ما حنتعلمها في الكتب!
ومنها حتكون مراجعة لكلمات حافظينها مسبقاً، وتراها تجربة حلوة دايماً ينادوني اهلي اقرا لهم اشياء مكتوبة على اغراض اشتروها واتفلسف عليهم 😁
تطبيقات الكتب الصوتية
لما اشتريت الرويات اللي اتكلمت عنها قبل بعضها كان مستواها الادبي متقدم بعض الشي فحاولت ابحث عن الروايات نفسها ككتب صوتية ولقيت:
تطبيق 荔枝 ليتشي، الجميل فيه انه يوفر كتب وروايات صوتية من تسجيل ناس عادية ففي خيارات كتير تختاروا الصوت اللي ترتاحو معاه.
كمان يوفر برودكاستات او تدوينات صوتية لمواضيع مختلفة تقدروا تختاروا منها اللي يعجبكم عن طريق البحث عن الموضوع او شخصية، ومعروف قد ايش البرودكاستات مفيدة وتطور في اللغة، غير انه يوفر خاصية التحميل👍
من التطبيقات اللي مفيدة في البرودكاستات تطبيق هيمالايا طبعا مهو مخصص للصيني زي التطبيق ليتشي لكن تقدروا تحددوا اللغة في البداية وماراح يقصر بالاقتراحات.
المانهوا 漫画
لعشاق الانمي ومحبي المانجا ممكن تجربوا تقرؤا مانجا بالصيني…ليش لأ؟
طبعاً لازم اعطي نبذة بسيطة انه كلمة مانهوا (ووجود حرف الهاء هنا مو خطأ كتابي)هي اسم القصص المصورة الصينية، 漫 (مان) وهو كاركتر يستخدم لوصف الرسوم المتحركة، 画 (هوا) يعني الفعل يرسم ومع بعض تعطي اسم كاريكاتير.
ممكن تقولوا كيف ومستوايا ما يساعد اني اقرا كركترات افكر اقرا مانهوا؟ نركز احنا قلنا نرفع من مستوانا وهدا فعلا يساعد.
لو اتحمسنا مع القصة اللي حنقراها وصادفنا كاركتر ما نعرفه حندور عليه ونجرب نرسمه في المترجم وبكده حنعرف معناه وعمرنا ما حننساه! وحنكمل قراءتنا. شويه متعب في البداية لكن تجربة مختلفة لشي نحبه الا وهو المانجا!
في تطبيقات كتير صراحة توفر مانهوا صينية منها تطبيق 快看漫画 التطبيق بحر واسع من المانهوا، حاولوا تختاروا الكويس.
اتوقع في تطبيقات ومواقع تترجم مانهوا للعربية فلو ما عرفتوا كاركتر بالنسخة الصينية ممكن تقروها مترجمة وتساعد بشكلٍ ما.
اللي شجعني اقرأ مانهوا مع اني ما اتحملها والحق ضغطت على نفسي عشان اقراها في البداية هو وجود مانهوا لدراما كنت انتظرها وما نزلت، ولما نزلت سحبت عالتطبيق صراحة لاني فعلا ما اميل لها مع اني اتشديت للموضوع وبدأت اغير رايي في المانجا، والحلو في التجربة انه قراءة المانهوا ساعدتني اقرأ مصطلحات جديدة واغلبها عامية دارجة.
الصراحة اترددت كتير عشان اشارك دا التطبيق لاني زي ما قلت قبل ترا التطبيق فيلو قصص🍳لكن قلت اشاركم هو ممكن في احد يستفيد منه ويارب تكون فقرة شاهدة ليا مو عليا…واكرر انتوا ادرى باللي المفروض تقروه، وابرئ ذمتي!!
ملاحظة اخيره اغلب التطبيقات الصينية مو متوفرة في متجر التطبيقات فحاولوا تشوفوا طريقة امنة تحملوها على اجهزتكم.
وبس! باقي انتوا شاركوني طرق ساعدتكم تتعلموا اي لغة من غير ما تحسوا….
وكالعادة دمتم بود…