2020/6/1
مذكرات الاربعاء
مع كرونا والحالات اللي كانت تتزايد في المدينة، صار عندنا مختبر تحليل العينات تبع وزارة الصحة وبفضل الله ثم مساعدة صحبتي وكم شخص رائع قدرت اتطوع معاهم…بس التطوع دي المرة مختلف.
طبعا ولان اللي في المختبر صينيين صرت انا متطوعة في ايش؟؟؟ مترجمة لغة صينية :)
البداية…الى الان
بدأ الموضوع لما كنت باكلم صحباتي اني اعاني للان ابغى احد هنا امارس معاه اللغة وطلع زوج وحدة من صحباتي يشتغل في مختبرات كرونا اللي عملوها الفترة الا راحت، واقترحت علي تكلم زوجها لو اني اروح المختبر واتكلم وجهاً لوجه مع الصينين اللي هناك، وماقصرت والله كلمت استاذي حالياً أ.مشعل.
صراحة ساعدني وبيساعدني مرة كتير واعطاني الفكرة اني اسجل كمترجمة متطوعة لايام محددة في وزارة الصحة وكان اكتر واحد يشجعني اجي اذا كان في اي زيارة من وزارة الصحة من الرياض.
اتصل علي اليوم وقال لي في وفد جاي…لو تجي يكون افضل بحيث اجرب لاول مرة اترجم مباشرة وما قصر شرح للصينيين انهم ما يتكلموا الا صيني عشان انا اترجم وفعلا يسعدهم مع انه ما عندي خبرة في الترجمة لكنهم رحبوا بالفكرة وكانوا مرة متعاونين.
المهم جا الوفد وبعد التعريف وكدة قالهم استاذ مشعل فقط اتكلموا عربي وهدى تترجم ووافق اعضاء الوفد كمان.
مع ان الموضوع رسمي ويمكن كانوا مشغولين وتوهم واصلين من سفر لكن كانوا جد متعاونين ولطيفين صراحة، يسألوني وانا اشرح للصينيين والحمدلله تم الموضوع بسلاسة، ومررة انبسطت كانت تجربة ما تتنسي😍.
بعد ما خلصنا الكل شكر ومشي وودعناهم خلاص، لكن رجع واحد من الوفد وجلس يشكرني ما يدري انه انا اللي من جد اشكرهم على فرصة زي اليوم😭💖 والجميل ان الصينيين فهموا الموضوع من تعابيره☺
وبس والله كنت دايم اتمنى اعمل مترجمة واليوم كانت البداية وعقبال فرص اكبر واجمل.
ثرثرة جانبية
وانا في وسط الترجمة جاني حديث النفس، ومدحت نفسي(واو والله ما اتوترتي) وفجأة… الكلام اللي ابغى اقوله طار من مخي، واتوترت فعلياً وكنت حجيب العيد🤭
اخوية يقول لي دي حالة لها مصطلح علمي بس نسيه، لكن نصيحة لا تعجبوا بنفسكم الا لما تخلصوا اللي انتوا فيه ولا ممكن يصير لكم زيي.
وبس والله اليوم كنت 翻译者 وحبيت اشاركم التجربة طاازة بعد ما صحيت من نومة لذيييذة🤤.
ودمتم بود💜