الصراحة كان الشهر اللي فيه الاختبار مرة ضغط من كل مكان وكنت استنى بس يوم الاختبار يجي…سنين وانا احلم اختبر وحاولت في كذا مكان وما اتسهلت وسبحان الله السنة دي شهر 5 ميلادي فتحوا الاختبار في جدة (جامعة الملك عبد العزيز) وما دريت الا متاخر (والحمدلله اني ما اختبرت لاني ما كنت خلصت الكتب اصلاً)

فلما فتحوا الاختبار لشهر نوفمبر ما صدقت على طول سجلت واجتهدت اني اخلص الكتب…الاسبوعين اللي قبل يوم الاختبار بالضبط سبحان الله زكمت زكام ما قد زكمته في حياتي مع التهاب في الاذنين فكانت المذاكرة بالمسكنات.

يوم السبت صحيت قبل الفجر واختباري يبدأ الساعة 10:30 المهم جلست وفطرت مع مامتي واخدت ادويتي وراجعت المراجعة الاخيرة لنموذجين من نماذج الاختبار التجريبية وقفلت الجهاز ولبست واستعديت.

بس افتكرت انه غطا الشريحة حق جوالي في سيارة مرة اخوية فقلت لها تجي لعندنا الفندق وتجيبه ليا الين ما يجي وقت الاختبار واروح مع اخوية الكبير اللي سافر من ينبع خصيصا بس عشان يوديني للجامعة واختبر😍

قبل الاختبار على الساعة 9 الا ربع اتصلت علي مرة اخوية تقول انها صدمت سيارتها… وتبغا اخوية الصغير يروح لها لانها قريبة من عند الفندق ووقتها اخوية كان خرج فأتوترت مرررة… فرجعت اتصلت عليها بس ابغا اطمن لانه من الفجعة ما سالتها المرة الاولى الوضع كيف؟

قالت لي انه اخوية الكبير جا لعندها وانها كانت مفجوعة بس وحصل خير ما في مشاكل والحمدلله عدت سليمة لكن ينتظروا نجم يجي عشان يحلوا الاشكال.

الوقت سار يمر وقربت 9:30 (لازم اروح للقاعة قبل الاختبار بنص ساعة) وانا لا رحت ولا اخدت الشريحة عشان النت ولا قابلت مرة اخوية عشان اخد الغطا ولا جا اخوية الكبير عشان يوديني…

دق عليا اخوية الكبير وقال لي انه حيتاخر افضل اروح للاختبار مع اخوية الصغير ونمر عليهم اخد غطا الشريحة اللي كل المشاكل حصلت بسببه😑

نزلنا وعند السيارة اكتشفت انه جوالي بدون نت وخرايط قوقل مو راضية تشتغل عشان اعرف الطريق للجامعة واخوية الصغير ما يعرف للطريق…فرجعت جري تاني لغرفتنا بس عشان في نت منه اقدر ارسل لاخوية الصغير الموقع على جواله…ويا نفسي انقطع😵 (للاسف ما عندي لياقة) لاني طلعت بالدرج للدور الرابع بسبب انه المصعد فجاة قرر يطلع على فوق بدل ما ينزل لي! والوقت بيمشي فيادوبك الحق زحمة الطريق…

بعد ما رسلت الموقع رحت اخيرا للجامعة وكانت الساعة جات 10 دخلت الجامعة مني عارفة ايت قاعة بالضبط فسرت اسأل والكل بس يأشر مو فاضي (لانهم خارجين توهم من الاختبار)

لقيت قاعة فيها مجموعة بنات وسألتهم بتختبروا HSK؟ قالوا ايوه والاختبار لسه ما بدأ فجلست والكل بيراجع لكن لاحظت انه كتبهم ابداً مو زي كتبي وانا من فلاحتي نزلت بس بشنطتي الصغنونة بدون كتبي فدقيت على اخوية الصغير (والله يا غلبتوا معايا) قلت له احمد ازا لسه موجود تعال جبلي الكتب منها اراجع الين 10:30 فقال لي طيب… شوية حسيت بتأنيب الضمير انه ما له داعي اغلبه🙃 فرجعت اتصلت قلت له خلاص بلاش تجيبها قال اطلعي خديها انا عند الباب🙄🙊

خرجت اخدتها ورجعت للقاعة قمت سألتهم اختباركم اي مستوى؟ قالولي التاني!!

فلميت عفشي وجيت خارجة وانا خارجة جات وحدة وقالت فين هدى يوسف؟ رفعت يدي زي حركات الطلاب المؤدبين: انا🙋‍♀️، قالت لي تعالي مو هنا اختبارك

سألتها اتاخرت؟ قالت لا عادي ودخلت القاعة وكانت مدرج فيها بنات توهم خلصوا اختبار المستوى الاول… الكل خرج جلست ما في احد بيختبر المستوى الرابع غيري!

كنت انا ومشرفة تتكلم عربي ومشرفة صينية قالت لي حنبدأ الاختبار فعبي يلا الفورم حق المعلومات الشخصية ويلا بسرعة هدا الملف حق اختبارك مقفل ما اعرف ايش الاسئلة اللي فيه حفتحه هنا قدامك…الوضع كان كمية توتر😨 ليش ما اعرف…

المهم بدينا بسم الله الاختبار الجزء السماعي والسؤال الاول…الا خرجت المشرفة الصينية من هنا والصوت وقف من هنا…. جلسنا لفترة يمكن اقل من دقيقة…. فسألت المشرفة اللي تتكلم عربي اش به وقف؟ قالت لا هو يوقف فترة عشان تعبي او بالاصح تكتبي الاجابة قلت لها… الصوت قطع في نص الكلام😐 فاكتشفت انه السماعة خرجت او السلك حقها المهم قطع الصوت ومشي الاخ للسؤال التالت يمكن🙃…

فاطضرينا نرجع من اول وجديد( لا وانا اقول لها لا لا رجعي كمان…لا…استني… اييوة هنا😂) ومن هنا سبحان الله راح التوتر وعادي عدى الجزء تبع الصح والخطأ سهالات الحمد لله.

اللي يضحك في الموضوع وانا اسمع كانت تجيني افكار في راسي (الهدف حق الاختبار ووصلتي له…ايش الهدف التاني؟!!، محد قدك الان بتختبري) بس بعدها اصحصح انه انت في جزء سماعي لازم تركزي.

كله كان تمام الين جيت للجزء حق كتابة الجمل: يعطوك صور ومعاها كلمات. وانت تكتب جملة عليها كتبت وكتبت الين وصلت لصورة لحرمة لابسة شال والكلمة كانت (الدفء) حبيت اكتب انها تحس الدفء، كلمة تحس اللي هي (感觉) لكن نسيت كيف اكتب (觉) تماما عصرت مخي عصرت مخي😵 ووقت الاختبار كان خلاص عالنهاية ما قدرت اخر شي كتبتها بالبين يين… وما اعرف ازا حيحسبوها ليا ولا لا🤷‍♀️

لكن الاختبار ككل كان سهل وللان انتظر النتيجة حقته لانها تطلع بعد شهر من الاختبار! والشهادة كماان بعد عشرة ايام!!

من تجربتي اللطيفة دي حسيت انه في اشياء لو عرفتها قبل كنت اكيد حخلص ابدر مو عالوقت زي ما سويت وحابة اكتب عنها تدوينة منفصلة لانه هنا الهرج مرة كتر وما ينفع ازيد اكتر من كدة…معليش اتحملوني مرة اتحمست🙊.

اخيرا حاجات لطيفة كتير حصلت لي داك اليوم منها:

• المشرفة اللي تتكلم عربي الله يسعدها بالها كان مرة وسيع ولطيفة مرة وجلسنا نهرج بعد ما خلصت واتبادلنا الارقام كمان.

• وحدة رسلت لي هنا في المدونة طلعت قابلتها في القاعة قبل ما ابدأ واتكلمنا كم كلمة وخرجت لانه مو مسموح يجلسوا بعد ما يخلصوا وسرنا صديقات في تويتر الان🌷

• بعد ما خلصت الاختبار كول اهلي اتصلوا واتطمنوا علي الله يسعدهم بسببهم يومي كان حيضل لطيف لو ادائي ما كان كويس لا قدر الله.

• اخدت اهلي ورحنا مطعم صيني وخليتهم طلبوا اللي يبغوه…عاد مرمطتهم من المدينة لجدة بس عشان يكونوا معايا😀وهدا اقل شي اسويه لهم.

وبس والله ممكن اني اختبر ما يعتبر داك الانجاز للبعض (سنين وانا اتعلم بعدين بس المستوى الرابع!) لكن بالنسبالي كان حلم خصوصا انه ما كان في فرصة اختبر في السعودية قبل كدة، وسبحان الله كل شيء في وقته جميل.

فنختم بمقولة تناسب تدوينة اليوم:

(活到老，学到老)

خو داو لاو، شُيه داو لاو (عيش واتعلم، محد يكبر على التعلم!)

ودمتم بود💗