طيب بما انه نسبياً عدد السلبيات في النظام المبسط كتيرة ليش استحدثوه؟

الفكرة بدأت من عام ١٩٢٠ على يد مجموعة من الكتاب الصينيين لكن النظام الفعلي تم في العام ١٩٥٠ وللان مازال في علماء شغالين يطوروا فيه.

النظام انشاؤه كان بعد انشاء جمهورية الصين الشعبية عام ١٩٤٩ لأن الحكومة حاولت تحد من الجهل المنتشر، وعشان تنشر الثقافة الصينية في العالم والسبب الأهم حاولت تبسط اللغة على الأجانب اللي يبغوا يتعلمو الصينية(شايفين من متى وهما هدفهم ينشروا لغتهم؟) وما ننكر انه فعلا نظام سهل مقارنةً بالنظام التقليدي.

اول ما بدأت اتعلم الصيني كنت اي فيديو القاه ويناسبني اتعلم منه بدون ما اعرف انه في فرق، غير انه بسبب حظر اليوتيوب في الصين كانت الدرامات والمسلسلات اللي باتفرج عليها اغلبها تايوانية فلما بديت اركز عالكتابة انتبهت انه تايوان يستخدمو النظام التقليدي والفيديوهات اللي كنت اتعلم منها كانت اغلبها تعلم المندرين يعني لغة بكين يعني النظام المبسط…وما فرق داك الفرق الجبار فخلاصة هذا الكلام الموضوع راجع لكم!

انتو تحددوا ايش هدفكم من تعلم الصينية هل تحبوا يكون عندكم الأساس ومنه يسهل عليكم التواصل في أكتر من دولة (اذن النظام التقليدي) او انتو حابين تدرسوا او تشتغلو او تعملو تجارة في الصين (اذن النظام المبسط) لانه نفس الفرق بين الانجليزي البريطاني والانجليزي الإمريكي تقريباً.

لكن كوني بديت واعتمدت النظام المبسط شخصياً ما منعني اني اعرف النظام التقليدي وزي ما شفنا الفرق مهو خياالي اننا مانقدر نوفق بينهم.

لكن كرأي شخصي يعجبني النظام التقليدي مع انه معقد لكنه مميز ثري يمثل الثقافة والتاريخ في عدد من الخطوط.