التدريس عن بعد ممل بعض الاحيان بالنسبة للطلاب، تعزيز الدرس بألعاب في نفس الموضوع تغير الجو وفي نفس الوقت تثبت المعلومة. في النقاط الجية بعض الاشياء اللي ركزت عليها في تحضيري لدروسي او عرض نقاط الدروس:

• قوالب الدرس تكون مميزة وما تشتت الطلاب وموقع Slidesgo مرة بطل في دا الموضوع.

• موقع word wall من المواقع المفيدة في عمل مراجعات واختبارات قصيرة للطلاب، والحلو فيه انه عربي ورسومه رمزيه جداً.

• كويزلت Quizlet ومين ما يعرفه؟ انا شخصياً استفدت منه وحالياً باستخدمه مع طلابي في تثبيت المعلومات، غير انه له تطبيق جوال.

• الانشطة والالعاب، اكتر شي استخدمه قالب في موقع Slidesgo تحت اسم Word Work Activities قالب مميز لعمل العاب تفاعلية في الحصة.

• تطبيقات الجوال زي تطبيقي المفضل ChineseSkills ساعدني جداً في النغمات والاصوات لاننا عن بعد ناخد الحصة ونقفل فمين يراجع معاهم لو انشغلت وحبو يراجعو الاصوات الجديدة؟ دا التطبيق.

• طبعا قروب الواتس للتواصل خارج الدرس، اضافة لساعة اضافية في يوم هم يحددوه نحل فيها تمارين اكتر.

• الفيديوهات وافلام الكرتون البونص والاشياء دي ما يحتاج اشرح ايش فايدتها.

• تحفيز الطالبات، كان من المحفزات اني وعدتهم يكلموا صديقتي الصينية نتاشا بعد ما يتقنوا عدة مهارات في اللغة عشان يبيضوا وجهي قدامها😁😁😁😁😁😁😁😁وجدا متحمسين لدا الموضوع.

وبس كان هدا اللي شاغلني الفترة دي، حبيت اشارك معاكم خطوة جديدة خطيتها مع اللغة، الشهر الماضي كان حافل وحالياً مشغولة فقط مع طالبتي اللي تجيني البيت لانه طالبات الاونلاين عندهم اختبارات. حنستأنف نهاية دا الشهر ان شاء الله.

اووه نسيت اقول لكم انا كمان ادرس طالبة صينية في الصين😎😎…بس هدي خلي لها يوم تاني احكيكم عنها

كالعادة…دمتم بود ومن اليوم ورايح انا 老师