البين يين

اتكلمت قبل عن هدا النظام بأنة يستخدم الحروف اللاتينية لتمثيل الكركترات الصينية اللي تمثل الكلمات…

المقاطع في البين يين مكونة من أصوات ساكنة ابتدائية (الحروف اللاتينية الساكنة وأصوات متحركة نهائية (حروف العلة في الإنجليزية مع الحروف الساكنة)

واحنا عارفين ان النغمات اللي تمثل صوت الكلمة عبارة عن حركات توضع فوق حرف العلة…

عشان يسهل علينا موضوع الحركات دي نقدر نتخيلها زي الحركات في اللغة العربية بمجرد اختلاف تشكيل الكلمة حيتغير معنى الكلمة لكن الفرق انه في الصينية تكون حركة واحدة بس على حرف العلة فقط على اساسها يتغير صوت الكلمة.

عدد الأصوات كمجمل ٥٩ صوت 23 صوت ساكن اوابتدائي و 36 صوت متحرك او نهائي(نهاية الكلمة)…اعرف ان العدد شوية كبير ويحسس فعلا بالصعوبة لكن اغلب الاصوات الثابتة اصواتها نفس اصوات الحروف الانجليزية.

في الصور تحت شرحت كل حرف من فين يكون مخرجه ومثال على تطبيقه حتفضلنا طريقة النطق وهيا موضوع الفيديو القادم بإذن الله

• هنا نجي للحروف اللي مختلفة شوية في النطق وتحتاج ممارسة كتير الين نتقنها، في البداية ممكن نحس انها كلها متشابهه لكن هيا فعلا مختلفة لو عرفنا كل حرف من فين نخرجه.

• طيب..وصلنا للأصوات النهائية وعددها ٣٦صوت 🙈 وهيا اللي تحدد نغمة الكلمة…

• ممكن تكون مفردة وهيا بالضبط حروف العلة في اللغة الإنجليزية زائد ü (في اللغة الألمانية)😁، وممكن تكون مركبة (حرفين متحركين مع بعض) اضافة لحرف أو أكثر ابتدائي أو ممكن بدونه.

• ممكن يتكون المقطع من حرف متحرك واحد فقط، لكن مستحيل يتكون مقطع من حرف ساكن فقط! بدون حرف متحرك واحد على الأقل.

• طيب كيف ننطق حرف الـü ؟قلت قبل انه في اللغة الألمانية، لكن عشان نتدرب على نطقة نبدأ بحرف ال i بنفس طريقة نطقه في كلمة machine لكن!! بدل ما نكسره نحاول ننطقه والشفاه تكون بشكل دائره صغيرة مضمومة….بكدة نكون محترفين نطقه😎

• صح قلت كمجموع ٥٩صوت لكن ما ذكرتها كووولها لاني مخلية الباقي بشرح اوسع للفيديو (لو مركزين حتعرفو كم صوت ناقص…بدون ماترجعوا تعدوا،بدون غش😏)

كتجربة شخصية ولأنو ما كان عندي ديك الخلفية عن الطريقة الصحيحة لتعلم اللغة، ما اعتمدت على نظام البين يين بالضبط بدا الشكل…

لاحظت الحروف اللي نطقها مختلف عن الانجليزي زي الx,q,ch,sh ، انو كلهم شين لكن الفرق الصحيح بين نطقهم ماركزت عليه وركزت على معرفة تكوين المقاطع عشان تساعدني في الكتابة في الأجهزة الإلكترونية…لكن بعدها لاحظت انو لما اتكلم مع شخص صيني كنت انطق كلمة في بالي شي لكن نطقي يعطي شي تاني فيسبب لخبطة للشخص اللي باتكلم معاه، مع ان الوضع كان تمام لما تكون المحادثة كتابية!

فركزت على دا النظام في السنتين الأخيرة وفرق جدا معايا، فاللي ابغا اوصلوا لكم هوا لو من البداية اتعلمنا صح وتعبنا شويتين حنختصر على نفسنا وقت كتير…وكتير جداً.