النغمات الصوتية
بما اننا فهنا اخيرا ايش يعني لغة صوتية…ما حنستفيد شي لو ما عرفنا كيف نطبق النغمات الصوتية للغة اللي بنتعلمها…
كم نغمة صوتية لازم نتعلم؟
من حسن الحظ ان النغمات اللي حنتعلمها اليوم تم تقليصها لهذا العدد من مجموع تقريبا 12 نغمة صوتية في اللغة الصينية.
حنتعلم 4 نغمات اضافة للخامسة اللي هيا النغمة الطبيعية…اللي العادة ما تتمثل بأي حركة ولا تعتبر نغمة فعليا(لكن لازم نتعلمها 😎)
الحركات في الفيديو فوق تكتب فوق الحرف المتحرك، بمعنى ادق فوق الأصوات النهائية (لها موضوع مستقل، راجعوا تدوينة نظام البين ين)
النغمة الأولى تكون في المستوى الأول او المستوى الخامس على السلم الموسيقي.
النغمة الثانية تبدأ عند المستوى الثالث في السلم الموسيقى وتنتهي عند المستوى الخامس…يعني ترتفع.
النغمة الثالثة تبدأ عند المستوى الثاني بعدها تنخفض للمستوى الأول ثم ترتفع مباشرة للمستوى الرابع في السلم الموسيقي…كثير يخلط بين النغمة الثالثة والثانية لكن الثالثة اطول ومتغيرة.
النغمة الرابعة تبدأ عند المستوى الخامس على السلم الموسيقي ثم تنخفض وتتوقف عند المستوى الاول، وهي النغمة الأقصر.
في الفيديو تحت اخذت مثال لحرف الـa بتطبيق النغمات الأربعة علية ومثال واحد لكل نغمة لما يجي حرف الـaالمتحرك مع حرف(m)الميم الساكن، عشان يوضح لكم طريقة تكوين المقاطع ادرجت صوت لنطق الحرف والمثال.
ملاحظات مهمة
لازم تربطو الكركترات اللي بتتعلموها بأصواتها لأنها راح تسهل عليكم كتير مع الأيام.
ذكرت في الفيديو تعلم نظام (البين يين) وهدا عشان نتعرف على طريقة تركيب الكاركتر…وهدا شرحو مفصل في تدوينة نظام البين يين..
طبعا حرف الـa فقط مايكفي وما حبيت اطول الفيديو لانو تدوينة (البين يين) حتشرح بالتفصيل بقية الحروف.
النغمة الطبيعية:
تستخدم في حال كان عندي كلمة تتكون من مقطعين كلهم لهم نفس النغمة، من الطبيعي حيكون شوية صعب تكرار النغمة فنخلي المقطع الأول بنغمته والمقطع الثاني يسير بنغمة طبيعية.
اخيرا قد يكون الموضوع لسه معقد عشان كدة يسعدني اعرف ايش عكس معاكم؟ في حسابات التواصل تحت تقدروا تسألوني كووول اللي يخطر ببالكم في دا الموضوع.