وأعني باتجاه أنفسكم يعني تصرفاتكم، ردّات فعلكم، كلامكم، وأي شي سوّيتوه وانزعجتوا منه وسبّب لكم دوامة أفكار.

لما تهوجسون بموضوع معيّن فكروا بليه؟ وأيش السبب؟

يعني ليه انزعجتوا من تصرفكم أو مثلاً ممكن يسبّب لكم تفكير دائم وهذا يعني إنه تصرّف تكرّرونه باستمرار وهنا المشكلة.

أولاً: المقصد هنا مو تزيدون هواجيسكم، المقصد أولاً وأخيراً تفهمون مشاعركم وأفكاركم، وهالشي يساعدكم تتجنبونها مستقبلاً.

ثانياً: التفكير مطولاً بهذي الطريقة يساعدكم تطورون أنفسكم وتتركون أي تصرف يسبّب لكم ولو أقل قدر من الانزعاج.

حتى لو كان التصرف عادة قديمة عندكم وتكرّرونها دائماً ما يعني استحالة تركها، تذكّروا أي تصرف يسبب لكم قلق، انزعاج، تفكير، ضيقة، حاولوا تتركونه ولو كلفكم الكثير.. ما فيه شي أهم من نفسيتكم.

أما الجزء الأثقل، ألا وهو اتجاه الأشخاص (والأثقل لعدم مقدرتكم بالتحكم فيه)

لكن تقدرون تتحكمون بنظرتكم، وردّة فعلكم اتجاهه.

ويعتمد هذا الجزء على أكثر من شي:

*هل الأشخاص في بيئتكم باستمرار؟ (الأهل)

*هل الأشخاص في بيئة عمل أو دراسة؟

*أو هل الأشخاص من المُقربين لكم (شعورياً)

طيب بحال كانوا من الأهل؟ كيف ممكن أفكر بتصرفاتهم بدون ما أنزعج؟

تذكّروا عدّة أمور مهمة:

أولاً: أنتم مو مسؤولين عن اللي يقولونه، ولا لازم يكون كلامهم صح. يعني بحال قالوا صفة مو فيكم لا يسبّب لكم الموضوع هواجيس؛ لأن ببساطة هذي نظرتهم مو الواقع!

ثانياً: ابتعدوا عنهم بأي نقاش تعرفون نتائجه سلفاً.

ثالثا: لا تناقشون أبداً، النقاشات أحياناً تزيد من سوء المشاعر (مشاعركم اتجاه الموقف، واتجاه أهلكم)

ولا أعني لا تدافعون عن أنفسكم لو تطلّب الأمر، لكن لا تحاولون تثبتون لهم إن كلامهم غلط، ولو مرة بخاطركم تثبتون (اثبتوا بأفعالكم) وهذا الأمر ينطبق على سائر الناس مو بس الأهل.

وش سبب كلامي؟ لاحظوا إن أغلب هواجيسكم بتكون بسبب كلام سمعتوه منهم، لذلك لما تركزون بالمواقف بتعرفون وش المزعج بالضبط وتبتعدون عنه.

ليه أتكلم كذا عن الأهل؟ لأن مو الكل زي بعض، وفعلاً فيه ناس تعاني من مشكلة التعليقات المستمرة من أهلهم، وهالشي يسبب لهم انزعاج وأفكار سلبية.

طيب لو الأشخاص بالعمل أو الدراسة؟

الحل دائماً هو (الحدود) خلوا حدودكم صارمة وواضحة جداً، وبحال شخص حاول يتجاوزها خلكم صريحين وردّوا بأن الكلام بهذي النقطة شيء غير مرحّب فيه بالنسبة لكم.

وبكذا بتقلّلون هواجيس بالليل وما راح تقولون ليتنا ردينا، وليتنا قلنا اللي بخاطرنا.

ولو كانت هواجيسي بسبب أشخاص أحبهم؟

ببساطة اتبعوا 3 نقاط:

وضّحوا انزعاجكم- نبّهوا- ابعدوا..

إيه بالضبط ابتعدوا عن أي شخص يسبّب لكم أفكار مُتواصلة، وابتعدوا عن أي شخص يسبّب لكم شكوك ودوامات.

مين من كان صدقوني محد أهم من أنفسكم.

فكروا بأيش السبب اللي يخليني أتحمل شخص مهما أنبهه ما يسمعني ويكمّل بالتصرفات المُزعجة؟ فكروا بليه أهوجس بكل وقت بسبب أشخاص أحبهم وأكن لهم مشاعر كويسة؟

محبتكم لشخص ما يعني التصاقكم فيه للأبد، كل شخص بالحياة تقدرون تستغنون عنه (ولو كان أغلى شخص بنظركم)

مُختصر الكلام بكل موقف: لا تدخلون بنقاشات، ولا تكثّرون كلام وتبرير وعتاب، ولا ترضون على أنفسكم وتتنازلون أكثر من اللازم.

كل ما قلّلتوا هالأشياء بتقل هواجيسكم.

أما الجزء الأسهل نوعاً ما، ألا وهو المواقف

ليه سهل؟ لأن لحدٍ ما، يمديكم تتحكّمون فيه أكثر، صحيح تحتاجون وقت لكن طبيعي جداً.

أولاً أيش المواقف المقصودة؟ أي موقف بالحياة بِلا استثناء.. مثلاً كان عندكم اختبار ولا حلّيتوا كويس، مقابلة عمل ولا أدّيتوا بشكل مُناسب، موقف صعب أو ثقيل مرّيتوا فيه.. وهكذا.

كيف ممكن تتعاملون مع هواجيسكم اتجاهه؟

طبعاً أعرف إن الهواجيس اتجاه المواقف تكون جداً مزعجة ووقعها ثقيل عليكم، لكن حلّها أولاً وأخيراً، غيّروا نظرتكم اتجاهها.

كيف؟ شوفوا الموقف على إنه درس تتعلمون منه، ما حليتوا كويس؟ هذا درس عشان تذاكرون بوقت أبكر، أو مثلاً تعطون أنفسكم وقت أكثر.

وإذا سوّيت اللي علي بس ما حليت؟ برضو غيرّوا نظرتكم وقولوا سوينا اللي علينا، المهم ما قصّرنا.. وأعرف صعب مو سهل، لكن حاولوا كله بسبيل تكون نفسيتكم أفضل.

أما بخصوص المقابلة أو أي فرصة ضاعت منكم..

تذكّروا إن الخير فيما يختاره الله، بمعنى لو كانت خير لكم بتصير، ولو كانت مكتوبة لكم أصلاً ما راح تضيع.. الحمدلله وكله خير لنا لكن نجهله، ولو ضاع منكم شي صدقوني ربي يعوضكم بأضعاف لكن اصبروا واحتسبوا.

وكذلك سائر المواقف تعاملوا معها بنفس الطريقة، غيّروا نظرتكم وشوفوها من اتجاهات مُختلفة. وسّعوا نظرتكم وبتدركون أشياء كثير ما كنتوا مستوعبينها قبل.

غير كذا صدقاً وإذا زعلتوا؟ هل بيتغيّر شي؟ بينعاد الاختبار؟ الدرجة بتصير أفضل؟ بتجيكم الوظيفة؟ بيمر الموقف؟ لا

إذن وش فايدة الهواجيس وكثرة الأفكار؟ ما تغيّر شي ولا تقدّم ولا تأخّر، رفقاً بأنفسكم وهوّنوا عليها.

وأولاً وأخيراً خذوها مني، والله الحياة ما تسوى تاخذونها بالجدّية هذي، لا هي دار القرار ولا هي الدار الأبدية لنا، الحياة مجرد طريق، سوو اللي عليكم من عبادات وطاعات، وسوو اللي عليكم اتجاه أنفسكم ومن تحبون واكتفوا بذلك. لا تحملون أنفسكم طاقة وجهد وتفكير وقلق، والله ما فيه شي يسوى (غير صحتكم وصحة من تحبون) ودام الموقف مو مصيري وما راح تتوقّف حياتكم عليه خلاص سايروا ومشّوا ترا مردّه يعدّي.

لا تكبرون الأمور وعطوا كل شي حقه، وكل شخص بمكانه الصحيح وخلاص، لا ترفعون سقف آمالكم لا بموقف ولا بشخص، كل ما رجّعتوا الأمور لمكانها الصح بدون إفراط بالمشاعر بترتاحون أكثر.. وأعني لا تقلقون بزيادة بشأن موقف ما يتطلّب هالكم الهائل من القلق، ولا تعطون شخص مشاعر أكثر من اللازم وهو ما يستحق إلا القليل… وهكذا امشوا على هذي الطريقة بكل الأمور.