أمريكا شيكا بيكا ٢

بعد ما وصلنا لأمريكا المحروسة ورحنا للجوازات، كان فيه مفاجأة مستنياني، رحت للجهاز اللي بنمرر عليه الفيزا علشان نعدي على طول ولا نقف في طابور الجوازات والظابط يحن علينا، المهم وقفت في الطابور علشان أختم وصاحبي اللي كان معايا فلت ودخل على طول.

المهم وصلت لظابط الجوازات وكانت أسئلته الجميلة ايه اللي جابك، أقصد سبب الزيارة وهتقعد قد ايه وفين، رديت على كل الأسئلة واتبقى السؤال الأخير هتقعد فين وراسه وألف سيف إني أقوله على عنوان أمريكي، أقوله يا عم الحاج احنا هناخد عربية من المطار وننطلق على فيلادليفيا، يقولي "Give me an address"، طبعًا لا فيه نت ولا أي حاجة أقدر أشوف بيها حجز فندق، طبعًا افتكرت كل سيناريوهات الأفلام وقصص الناس اللي بتترحل وترجع تاني ومابتدخلش أمريكا.

المضحك في الموضوع إن احنا فعلًا ماكناش عاملين أي حجوازت غير حجز العربية ، المهم افتكرت إن أنا كنت عامل download لخريطة NY على Google Maps بحيث تشتغل Offline لما نوصل، دخلت على الخريطة وافتكرت اسم فندق "The Row Times Square"، دخلت دورت عليه وقلت للظابط على عنوان الفندق وبس، قال لي كل مرة هتدخل أمريكا هينطلب منك عنوان، وعدينا وتنفسنا الصعداء.

الجو في نيويورك وقتها كان تحفة الحقيقة، جو خريفي وسِنة برد، زي جو مصر كده في أول فصل الشتاء.

بعدها رحنا مكان شركات إيجار العربيات، وكنا حاجزين قبل السفر من الموقع بتاعهم، وكنت عاملة رخصة السفر واتسألت لو معايا رخصة سواقة، فقلت لها على الرخصة السعودية واعتمدتها بدل رخصة السفر.

أخدنا العربية واتحركنا على Offline Google Maps وقعدنا ندور على أقرب مكان نجيب منه شريحة نت واتصالات علشان نتعامل في السفرية دي وربنا رزق بمحل عليه شعار شركة AT&T، وجبنا وقتها خط إنترنت مفتوح نت ومكالمات محلية بـ ٨٠$ تقريبا وشغلناه Hotspot وشغلنا عليه كل أجهزتنا تقريبًا 

بعدها كنّا فصلنا، فقعدنا ندور على مطعم عربي أو حلال بشكل عام ولقينا مطعم تقريباً أفغاني أو سريلانكي، ومشى الحال، وبعدها اتحركنا لفيلادلفيا، وكان لازم نعدي في نيويورك، وطبعًا اللي راح نيويورك عارف الزحمة قد ايه، وعلشان نتحرك وسط منهاتن أخدنا وقت كتير جدًا، وطبعًا زي أي حد أول مرة يروح مكان جديد وانبهارات بقى ما أقولكش وقعدنا نصور من العربية تقريباً طول الطريق (تخيل خضر حسنين الجبالي في فيلم عسكر في المعكسر وهو راكب التاكسي مع سعدية).

بعد يوم طويل، قررنا نحجز فندق في الطريق قبل فيلادلفيا ويكون سعره رخيص ويقضى الغرض بحيث نبيت ونمشي تاني يوم الصبح، وحجزنا في فندق اسمه Raritan Hotel.

أول تجربة في فندق في أمريكا واكتشفت إن الفنادق بتقدم القهوة كحاجة أساسية، ماكينة أمريكان كوفي ونوع قهوة عادي ونوع Decafe وده طبعًا غير الفنادق العربية اللي بتحط كاتل وشاي ونسكافية).

بيتنا الليلة دي وتاني يوم الصبح صحينا وجهزنا الدنيا واتحركنا لفيلادلفيا.
وهذا ما سنعرفه في البوست القادم إن شاء الله.