صباح الخير/مساء الخير, هالمرّة الموضوع يمكن يشوفه البعض متعارض مع تدوينة سابقة كانت تتكلم عن حبي للزراعة والنباتات بشكل عام لكن وجب التنبية عبدالله (في صف الطبيعة دائمًا وابدًا).

دائمًا ما كانت تربطني علاقة حب بالنباتات و الزراعة خاصة بأخر 5 سنوات

و أشوف كل جزء من النبتة يحمل حياة و جمال ويستحق التأمل،  و تزامن حبي للزراعة و النباتات مع بداية اهتمام جديد إلا  و هو الأعمال الخشبية :) اوكيه ظاهريًا الموضوع متناقض لكني أشوفه من ناحية ثانية و هي أولاً جميع الاخشاب الي استخدمها عمرها ما كانت من شجرة حية أو شجرة كبيرة ومعمرة ولها ظل وتفيد الناس , لأنها غالباً تكون اشجار لها ضرر أو مكانها غلط و قررو أصحابها أنهم يشيلونها أو حتى أشجار طاحت بفعل الطبيعة زي عاصفة , مطر قوي..الخ

ثانياً وهو الأهم الشجر بعد ما يموت قدامه طريقين أما حطب ويشبون فيه أو أني أخذه و أرجعه للحياة مره آخرى و يكون قطعة فنية فيها حياة وجمال .. و أكيد كلكم تتفقون أن الطريق الثاني أفضل .

و في يوم من الأيام بعد ما تقدمت خطوات بالمجال و صار عندي خبرة بسيطة شفت جذع خشب مرمي بالمزرعة أخذته و بدت مرحلة البحث عن أحد يقص هالاحجام ذي من جذوع الاشجار لكن كانت مرحلة صعبه لأنه يعتبر شي جديد ومحد يشتغل فيه، و بعد رحلة بحث طويلة و صعبة حصلت واحد و قصيته وهذا شكل القطعة بعد القص:

أسرتني تفاصيلها و قررت وقتها أني أحولها إلى شيء أستفيد منه ونقدر نقول من هنا بدأت رحلتي مع الخشب :)

بعد القص تجي مراحل كثير منها التنظيف و الصنفرة و الدهان و الارجل لأنه الخطة كانت تحويل قطعة الخشبة إلى طاولة ، بنفس الوقت كان مسيطر علي فكرة أنها تكون خشب لحاله فقط مميزة نسبياً لكن لازم تصير فيه إضافه إستثنائية و وقع الاختيار على إضافه مادة تسمى ( ايبوكسي ) غالباً ما تستخدم للأرضيات وفيه منها أنواع تدمج مع الخشب و تعطي لمسات خطيرة ومميزة وبنفس الوقت تزين من تماسك القطعة خصوصاً إذا كان فيه تشققات وفراغات نفس الي بالصورة…

بدأت رحلة ثانية إلا و هي البحث عن هالمادة من وين؟وكيف تستخدم؟ومين الموردين ؟ ….الخ

بالنهاية حصلت كل شيئ و بنفس الوقت لقيت شخص يشتغل بنفس المادة ذي و علمني عن بعض المصادر وصرنا أصدقاء  و شركاء بالشغل حالياً :)

مالكم بالطويلة بدت مراحل العمل، بهالشغلة المراحل متعبة جداً تأخذ وقت وجهد وتكاليف عاليه لكن النتيجة النهائية تنسيك كل الي راح ….

من كمية الجمال الي تشوفونه بدأت المشروع حقي وسميته (Space Wood) الترجمة (الخشب الفضائي) والفكرة أنه لازم تكون فيه فلسفة لكل اسم، و هي  بعد دمج الخشب بمادة (الايبوكسي) يكون شكله جديد و غريب كأنه قطعة نادرة سقطت من الفضاء :)

بدأ الشغل يكبر و الحمدالله صار من حساب انستقرام للمتجر و صار فيه تنوّع بالمنتجات والحين بشارككم بعض الصور…

طبعًا ماراح أوقف بهالمرحلة ترقبوا قناة اليوتيوب الي بيصير فيها شرح للشغل وبعض الأعمال لأن هالشغلة مراحلها ممتعة وتستاهل تتوثق