النوم
موضوع جدا مهم
من زان نومه زان يومه
شخص ما اعرفه لكنه مره رهيب و حكيم
النوم و ما ادراكم مالنوم
النوم شيئ جدا مهم لنا كبشر, جسديا و نفسيا و كل شيئيا
في فيدوهات تشرح ايش يصير لنا اذا ما نمنا كويس, بحاول الخص لكم الفيديوهات قدر المستطاع + احط لكم رابط لهم
طيب, ليش احنا لازم ننام من الاساس
هذا السؤال ما زال يطرحه العلماء الى يومنا هذا, ولكن في بعض الفرضيات اللي توصلو لها, اولها لها علاقة بالذاكرة و التذكر و الابداع, لما ننام تنتقل المعلومات من الذاكرة قصيرة الاجل الى الذاكرة طويلة الاجل عشان كذا كثير يحذر من عدم النوم وقت الاختبارات بحجة “اذاكر طول الليل افضل لي”
و سبب اخر توصلو له هو المظهر الخارجي الشخص اللي يعاني من قلة النوم مظهره يكون اسوء من الشخص اللي ياخذ حصته الطبيعية من النوم
و في فوائد كثيرة للنوم ما ودي اتطرق لها لكن بعضها بتحصلوها في قصتي مع النوم اللي بذكرها دحين
فتره النوم المثالي
جاتني فتره - اتوقع انها ايام الثانوي و بداية الجامعه يعني تقريبا من ثلاث سنوات- كنت حرفيا و بدون اي مبالغه احط راسي على المخدة انام مباشرة, و كنت اصحى كتله من الحيوية و الطاقة و اول ما تجي الساعه 11 مساء اروح سريري انام
طبعا في اشياء اضفتها لليومي عشان وصلت للنتيجة هذي
اول شي كنت مشغله الاضاءة الليلية في اجهزتي كلها
اتمرن في العصر
قبل النوم بساعه ابتعد عن الاجهزة
سويت لنفسي روتين قبل النوم
السرير كان بس للنوم
اول ما اقوم من النوم ارتب سريري
انام كل يوم في وقت واحد
طبعا بعدها بفتره اكتشفت ان هذي كلها اشياء مثبت علميا انها تساعد في النوم و كل واحد من هذول بشرح لكم عنه شوية
الاضاءة الليلية
احنا كبشر اجسامنا مبرمجه على النوم في الليل. نور الشمس له دور كبير في كمية النشاط اللي نحس فيها و العكس صحيح مع الظلام - اللي جده او جدته لسة على قيد الحياه, اولا الله يحفظهم ثانيا روحو اسألوهم عن كيف كان نومهم زمان, بيقولو انهم كانو بعد العشاء ينامو و يقومو بعد الفجر او شي مقارب- لان في ذاك الزمان كانت الاضاءة تقريبا دائما طبيعية ( نور الشمس) بالتالي اجسامهم ماشية على النظام الطبيعي
دحين الاضاءة الصناعية منتشرة بكثرة و هذا يؤثر على اجسامنا
عشان كذا اول نصيحة اقدمها لكم لتحسين جودة نومكم
شغلو night shift في جوالاتكم و اللابتوبات و جميع الاجهزة و حاولو انكم قبل النوم تبتعدو عنها
الالكترونيات تطلع نور ازرق يعطي دماغنا الانطباع انه لسة نهار و يصعب عليه استيعاب انو جاء وقت النوم
التمرين
طبعا التمارين نوعين تمارين رايقة و هادية زي اليوقا و تمارين الاطالة و المشي و تمارين فرفوشة و مليانه طاقة زي المقاومه و الكارديو و الرقص و الزومبا و الحركات بركات
النوع الاول ينصح به قبل النوم لانه يساعد العضلات على الاسترخاء و لو شغلتي موسيقى هادية او اصوات طبيعة تكوني برضو ساعدتي دماغك على الاستعداد للنوم و الهدوء
النوع الثاني يفضل انك ما تمارسيه خلال الخمس ساعات قبل النوم لانها ترفع النبض و درجة حرارة جسمك و الجسم عشان يدخل الحاله المناسبة للنوم لازم يبرد شوية
طقوس وقت النوم
وقت النوم ما ادراك ما وقت النوم, وقت النوم المفروض يكون شي مقدس عندنا كلنا لانه مهم جدا لعملية النوم
وقت النوم من المفروض انه يكون ثابت - يعني يا حلوة انتي و هيا كل يوم تنامي في نفس الوقت, مافي حركة يوم تنامي عشرة و يوم تنامي قبل الفجر-
و من الاساسي يكون عندك روتين قبل النوم - الروتين شي مهم جدا لنا كبشر و ناوية اكتب عنه تدوينه كامله لاني ادركت اهميته- يعني مثلا الساعه ثمانية تتعشي و ثمانية و نص تدخلي تتروشي تلبسي البجامه و تسوي يوقا الساعه تسعه تقرأي كتاب خفيف و عشرة تحطي راسك و تنامي, هذا يتكرر يوميا
اعتبري دماغك زي الكمبيوتر و لازم نبرمجه عشان يسوي وظائف معينه,
الروتين هو هذي البرمجه, يعني لما كل يوم قبل ما تنامي تلبسي بجامه و تقرأي كتاب و تشربي بابونج دماغك حيربط هذي الافعال بالنوم و اوتوماتك ينام حتى لو ما كنتي نعسانه - و هذا اللي صار لي-
و برضو السرير بس للنوم اول ما تقومي رتبيه ولا تجلسي عليه الا وقت النوم لان دماغك وقتها حيصير يربط السرير بشي واحد بس اللي هو النوم
هذي اهم النقاط اللي حسيت مهم اني اسهب فيها و لكن برضو بكتب لكم نصائح صغيرة ممكن تساعدكم وقت النوم
خلي جنب سريرك ورقة و قلم و قبل النوم اكتبي كل شي شاغل بالك
ابتعدي عن الوجبات الثقيلة قبل النوم مباشرة
الكافين برضو ابتعدو عنه قبل النوم بسته ساعات او خمسة
خلي الغرفة مظلمه و باردة و هادئة - محدثتكم ما تنام الا بلمبة سهاري و اصوات طبيعه-
تعرضي للشمس في النهار عشان جسمك يستوعب الفرق بين النهار و الليل
شاور دافي ممكن يساعدكم لانه يساعد العضلات تسترخي و يبرد جسمكم من جوا
في ناس ريحه اللافندر (البنفسج) تساعدهم ينامو جربو الزيوت العطرية زي الفانيلا و البنفسج و القرفة
اشربو شاي اعشاب (بابونج و بنفسج و يانسون و زهورات)
في ناس تعد الخرفان - الحيوانات مو الخرفان اللي في بالكم- عشان تنام لكن هذي الطريقة علميا مالها فائدة انا افضل التخيل, يعني مثلا اتخيل نفسي بعد كم سنه و انا امرأة ناجحه و اتخيل يومي بالتفصيل - عادة ما اوصل العصر في خيالي الا انا دايخه و نايمه-
ابتعدو عن الانشطه المجهدة عقليا قبل النوم مباشرة
حافظو على جدول النوم المرتب حتى في الويكند مسموح انكم تنامو ساعه او ساعتين زيادة بس - اذا ايام الدوام تصحي الساعه خمسة في الويكند مسموح لك تنامي الين الساعه سبعه-
و زي ما عودتكم في قائمه تشغيل يوتيوب هنا