التسويق

فترتك الجامعية المفترض أنها تكون تجربة حلوة،

لأنها بداية دخولك لعالم الكبار الرهيب

تبدأ تصير مسؤول عن نفسك و عن أغلب تفاصيل حياتك و تجرب أشياء جديدة.

أول سنة في الجامعة غريبة لأنو كل شي جديد،

و قرار أني أبدأ أصير شخص "مغامر"  كان أفضل شي سويته لنفسي

حاولت أني أتعلم قدر المستطاع داخل و خارج قاعة المحاضرات و أشارك في الأنشطة وأكّون علاقات كثيرة، حاولت أنظم نومي و روتيني اليومي عشان أنجز بدون ما أجهد نفسي

و هذي الأشياء رغم انها كانت مخيفة في وقتها أشكر أنفال الماضية لأنها واجهت مخاوفها و تعدت العقبات و صارت أنا الرهيبة.

أنصحكم بتجنب الأشخاص السلبيين و تعلم متى تقولو لا،

خلي علاقتكم بالأساتذة و الدكاترة طيبة و حاولوا تكونوا لطيفين و لبقين مع الجميع و أنشرو السعادة قدر المستطاع لأن الحياة أحيانا تكون صعبة و نحتاج شوية طاقة إيجابية

الفترة الجامعية مرحلة جميلة ومثرية تنمي شخصيتك من جميع الجوانب، أحرص على اكتشاف نفسك في هذه المرحلة،

صاحب الأشخاص الصح وقد ما تقدر ركز في تنمية نفسك ومهاراتك. 

أستمتعت في كل اللحظات وكنت أركز على تسليم المهام والتركيز في المشاريع والدرجات، الموضوع ما يتطلب جهد كبير في الدراسة ولكن الجدية في تسليم والمتابعة يقدم لك معدل حلو،

حضور المحاضرات، الحرص على الواجبات والتسليم شيء بتشكر نفسك عليه بالمستقبل. 

تجنب الإهمال والعشوائية!

بعد التخرج من الجامعة بتجني ما زرعت في هذه المرحلة وهو اللي بتاكله لفترة طويلة فحاول يكون لذيذ وطيب.

تجربتي في البحث عن وظيفة و حياة بعد التخرج ما كانت زي ما كنت أتوقع صراحة، 

النية كانت أني اجلس عاطلة لمدة شهرين الى ثلاث بعدها أبدأ البحث عن وظيفة، 

لكن نتيجة للعلاقات اللي كونتها داخل الجامعة و الأنشطة جاتني فرصتي الوظيفية لين عندي على صحن من ذهب.

الوظيفة اللي كنت أحلم بها (كاتبة محتوى تسويقي)!!

طبيعة الوظيفة كانت تميل للجانب الإبداعي، كتابة محتوى، عصف ذهني  لأفكار إعلانات و كتابة سيناروهات، كتابة تقارير بسيطة

بعدها انتقلت للمستوى الأعلى من المهام و صرت أسوي أشياء زي كتابة الخطط التسويقية، استراتيجيات المحتوى، إدارة الترويج على منصات متعددة.

و الحمدلله تعلمت الكثير في التسويق على ارض الواقع و اكتشفت اشياء ما درسناها في الجامعة و هذا واقع الحياة الوظيفية، مو كل شي درسناه في الجامعة يطبق في البيئة الوظيفية و العكس، مو كل شي نطبقه في الحياة الوظيفية درسناه في الجامعة،

في أشياء تساعدنا في العالم الوظيفي زي

تنمية شخصيتك و التطور قدر المستطاع مع الحفاظ على مستوى احترافية جيد، لأن هذي لغة عالم الاعمال و الوظائف

تلخيص تجربتي هو جرّب و لو خايف أنك ما ما راح تعرف تعلم وبعدين جرب!

تجربتي في البحث عن وظيفة بدأت قبل التخرج من آخر سنة في الجامعة تحديدًا بعد التدريب الميداني، قدمت لي الشركة عرض وظيفي بدوام جزئي وقررت أبدأ مسيرتي المهنية إنطلاقًا من هذه النقطة. 

أغلب المهام الموكلة لي كانت تميل للجانب الإداري من تنظيم، استقبال عملاء، تقديم عروض، مبيعات، تنظيم فعاليات وأنشطة. 

بإختصار مهام متنوعة وفيها شوي من التسويق ولكن اكتسبت منها مهارات عديدة تفيدني على الصعيد الشخصي والمهني. 

بعدها بسنة تخرجت وانتقلت لشركة  تسويق وإعلان بوظيفة أخصائية محتوى عن طريق الرهيبة أنفال وبدأت أشوف التسويق بشكل أقرب وأجمع خبرة وتجارب فيه بشكل أفضل، ولشغلي منصب كاتبة محتوى وبنفس الوقت أخصائية تسويق، غيروا المسمى الوظيفي لي لأخصائية محتوى وتسويق. 

اقدر الخص تجربتي في عدة نصائح منها مو لازم تبدأ حياتك المهنية في مجال دراستك وعملك بشكل مباشر  ممكن تتوظف بمسميات وبشركات ثانية تستفيد من بناء شخصية مهنية احترافية، وبعدها تقدر تتعمق في مجال دراستك وشغفك، طور دائمًا من نفسك وأتقن العمل اللي تقدمه مهما كانت الظروف والعوامل حولك، أبني لك علاقات جيدة في كل مكان تروح له (جامعة، وظيفة، صداقة) لأن الفرص تجيك من الأشخاص اللي تعرفهم بشكل كبير وأساسي، ثابر وبتوصل للوظيفة والمكان اللي يناسبك. 

المسميات والوظائف اللي شغلتها: 

1- أخصائية محتوى في وكالة حلول تسويقية إبداعية

شفتو الناس اللي طول شغلهم قدام كمبيوتر و يكتبو؟ -الحمدلله أني مو منهم-

 المهم،

منصبي هذا كان عبارة عن كتابة محتوى السوشال ميديا- مواقع- ملفات تعريفية وأغلب أنواع المحتويات اللي تشوفوها في عالمنا الرقمي

الوظيفة تتطلب أنك تكون على علم بالتريندات و الأشياء الكول زي الذبات و الميمز لأنها بتساعدك تكتب محتوى الناس يعجبها لدرجة أنها ممكن تشاركه مع أصدقائها

2- اخصائية تسويق و محتوى  في وكالة حلول تسويق إبداعية

في بداية عام 2021 استدعتني المديرة التنفيذية للشركة  و مديرة قسم التسويق و بلغوني بأنهم حابين يستغلو قدراتي التسويقية لأنو أثناء عملي لاحظو أن لما الفريق يتكلم عن مواضيع تسويقية أو و يطرحو أسئلة كانت أجوبتي جيدة  و لهذا قررو أنهم يسوو عملية تبديل بسيطة لمدة شهر مبدئيا، نقلوني من قسم المحتوى الى قسم  التسويق

هذا الكلام كان المفترض يكون لشهر واحد لكن بعد الشهر قررو أنهم  ييمددو الفترة و ليومكم هذا ما زلت أنفذ مهمات تسويقية وصرت رسميا أخصائية تسويق و محتوى 

 أنضاف لمهام  المحتوى مهام تسويقية متنوعة زي : (استراتيجية المحتوى - إدارة الترويج الرقمي - الخطط التسويقية - الحملات التسويقية - خطط استراتيجية تسويقية - خطط تطويرية للمشاريع - أفكار لتفعيل المنصات) وغيرها الكثير وصراحة نتيجة لهذا القرار اللي اتخذته الإدارة “الحكيمة” مستوى خبراتي في عالم التسويق نمى نمو ملحوظ خلال فترة جدا قصيرة.

و أخيرا…

العمل الحر و ما أدراكم ما العمل الحر، قبل ما أبدأ توقعت أني بصير زي الأشخاص اللي يشتغلو على شواطئ المالديف و يسافرو العالم - ممكن أصير هذا الشخص دعواتكم - لكني صرت الشخص اللي طول يومه شغل 

حاليا بما أني موظفة بدوام كامل ما اقدر أخذ الكثير من العملاء و أديرهم، عشان كذا حاليا مخلية العمل الحر شي أسويه متى ما فضيت و كانت عندي قدرة

المسميات والوظائف اللي شغلتها:

1- منسقة مجتمع في مركز لريادة الأعمال

اشتغلت في هذا المنصب مجموعة من الأعمال الادارية مثل (استقبال الزوار - وأخذهم في جولات وتعريفهم بالمكان - تقديم العروض السعرية لهم - تنظيم الأنشطة والفعاليات ) وما كانت تتعلق بالتسويق بشكل مباشر ولكن تعلمت منها الكثير من ناحية الهيكل الإداري والتشغيلي للشركات، الاجتماعات، والجانب الاحترافي.

2- منسقة قسم التسويق في مركز لريادة الأعمال:

حصلت على هذا المنصب بعد طلبي للادارة بتولي مهام تسويقية بحكم دراستي وتخصصي، وكنت أقوم بمختلف المهام مثل ( تنسيق الجهود التسويقية - إدارة حسابات وسائل التواصل الاجتماعي - كتابة المحتويات وأفكار التصاميم - التفاعل مع المتابعين - تغطية الفعاليات - الحملات والخطط التسويقية للشركة) تعلمت فيها من ناحية تسويقية بشكل أكبر ولكن عيب المرحلة عدم وجود إدارة فاهمة بالتسويق مع تدخلها في جميع التفاصيل والتغيرات. 

3- أخصائية محتوى في وكالة تسويق إبداعية

توظفت هنا عن طريق أنفال الرهيبة (عشان كذا قلت اهتموا بعلاقاتكم) بمنصب أخصائية محتوى والمهام تتضمن كتابة محتويات وسائل التواصل الاجتماعي، الملفات التعريفية للشركات، محتويات المواقع الإلكترونية، والكثير من الكتابة في مختلف المجالات، مطاعم، مقاهي، مراكز ترفيهية وسياحية،  عقارية وحكومية.

4- أخصائية محتوى وتسويق في وكالة تسويق إبداعية

ولأني رهيبة وفنانة بالتسويق تم إضافة مهام تسويقية أنجزها وتغير المسمى الوظيفي من أخصائية محتوى إلى أخصائية محتوى وتسويق وبديت أمسك مهام مثل: (استراتيجية المحتوى - إدارة الترويج الرقمي - الخطط التسويقية - الحملات التسويقية - خطط استراتيجية تسويقية - خطط تطويرية للمشاريع - أفكار لتفعيل المنصات) وغيرها الكثير وكانت فترة ممتعة جدًا.

تجربتي في العمل الحر متواضعة قليلًا، جربت أمسك عدد بسيط من العملاء وكانت تجربة مثيرة للاهتمام و متعبة في نفس الوقت. 

تتطلب مهارات كثير وأعتقد بعد سنتين من الخبرة في المجال الوظيفي ممكن أرجع للعمل الحر بعقلية ومميزات أحترافية أكثر