طيب, من العنوان اتوقع وضح لكم الطبخه هنا, بعطيكم قائمه نشاطات تقدرو تسووها و انتو في البيت, بعضها ترفيهي و بعضها تعليمي و بعضها فني, في نشاطات فردية و نشاطات جماعية - بحاول قدر المستطاع اني احط اكبر عدد ممكن احطه و انوع في النشاطات -يلا نبدأ

اول مجموعه نشاطات تحت فئة "تنظيم و تنظيف"

ممكن تسويها لحالك او اذا تتشاركي غرفة مع اختك او أي احد ممكن تتساعدو في هذي النشاطات

• تنظيف الربيع العميق

بما ان الربيع دخل في عادة يسويها الكثير اللي هي انهم ينظفو بيئتهم كامله تنظيف عميق, تحت السرير و فوق الدولاب و يطلعو الملابس الزايدة و ينظفو الدواليب, في ناس تخصص لها ويكند لكن بما اننا محجورين كل ايامنها ويكند, يدخل من ضمنها ترتيب و تنظيف المطبخ عشان رمضان

• غسيل الملابس

طبعا هنا أتكلم عن التركيز بس في ملابسك, شوفي دولابك ايش فيه, أي شي ما تحتاجيه او صغير او يحتاج اصلاح, ملابس تحتاج غسيل, غسليها و رجعيها الدولاب بكل ترتيب و عناية

• المشاريع المنزلية المتراكمه

فرفري في بيتك او غرفتك  وشوفي ايش الأشياء المتراكمه, هل في رف يحتاج تعليق, او دولاب تحتاجي تصلحي فيه شي, يمكن اشتريتي قطعه اثاث تحتاج تركيب او إطار صور و لسة ما علقتيه على الجدار

يمكن حابة تغيري ترتيب غرفتك بس عمرك ما فضيتي لها, دحين وقته

• يوم إعادة الضبط

  و هذا له تدوينه كامله هنا و برضو ممكن تعيدو ترتيب مساحتكم بذات اذا صرتو تشتغلو من البيت بشكل كبير

فئة النشاطات الفنية و الحرفية

في هذي الفئة اشجعكم على تبني و تنمية حسكم الفني الإبداعي

• ارجعو لهواية قديمه

كلنا عندنا هوايات سابقة تنمنى يكون عندنا الوقت انمارسها (رسم, نحت,حياكة و كوروشيه, خياطه,...) هذا الوقت عشان ترجعو تمارسوها

• تبنو هواية جديد

اكيد في هواية عجبتكم و اتمنيتو تتعلموها لكن ظروف و مشاغل الحياه منعتكم, مافي مشاغل ماسكتم دحين صح؟ يلا افتحو يويتوب و زي ما علمتكم في تدوينة التعلم من يوتيوب روحو تعلمو الهواية هذي

• ارسمو على و زينو الاسطح الفاضية في بيئتكم

عندي علب فاضية بالهبل, و كنت ارميها لين اكتشفت ان إعادة استخدامها افضل, و صرت الونها و ازينها و احتفظ فيها باشياء متنوعة زي الاكسسوارات

اكتبو!

• ارجعو اكتبو, شعر خواطر, كلام ماله معني, سوو دفتر مذكرات, افتحو دفتر او افتحو الملاحظات في جوالكم و اكتبو (ما يضر لو سويتو دفتر حلو و كتبتو فيه اضغطو هنا عشان تتعلمو كيف تحولو اي دفتر الى بلانر او منظم فعال)

نشاطات رياضية وحركية

ممكن تسوها لحالكم او مع احد

• العبو جاست دانس just dance

لعبة جاست دانس عبارة عن لعبة رقص, تطلع لكم رقصة في الشاشة و تقلدوها عشان تجمعو نقاط و تفوزو, العبة موجودة على عدة أجهزة منها الجوال, عشان تلعبوها تحتاجو جهاز لابتوب و جوال محمل عليه التطبيق – اضغطو هنا عشان تروحو الموقع- تفتحو التطبيق و تسجلو و تفتحو الموقع و تتبعو الارشادات و تبدأو لعب, كل شخص له 200 كوين يقدر يلعب فيها اغنيتين يوميا, في اشتراكات للناس اللي تلعب بشكل مستمر – انا صارلي تقريبا سنه و شوية مشتركه- فوق انها لعبة ممتعه, تمكنكم من الحركة و زيادة لياقتكم من غير ما تحسو, و اذا ما عندكم القدرة او الرغبة انكم تلعبو جاست دانس يوتيوب مليان فيدوهات رقص و زومبا لرفع اللياقة والتمرين

• مارسو اليوقا

طبعا اليوقا معروفة فوائدها للجسم و العقل, ممارسة اليوقا لمدة عشرة دقائق او بكل بساطه تمرينات إطالة لنفس المدة

• ممكن تعلبو العاب حركية جماعية

زي مثلا غميضة, حركة ستوب, متاهات

• يمديكم تلعبو الالعاب الجماعية 

  زي منوبولي, سعودي ديل, اونو, شيل يا نحس,…الخ -جرير مليان العاب جماعية حلوة- و اذا ما يمديكم في تطبيقات كثير للعب الجماعي ممكن تجربوها.

نشاطات تعليمية و خاصة بنشاط العقل

• عندي لكم تدوينه كامله عن التعلم الذاتي و تدوينه ثانية عن منصات التعليم –تم تحديثها و إضافة منصات جديدة-

• تعلمو هواية او مهارة جديدة

• اقرأو كتب

طبعا ما اقصد روايات, شوفو مجالكم او تخصصكم او أي مجال عندكم فيه فضول, و ابحثو عن كتب فيه و اختارو احدها و اقراوه الكترونيا مو لازم النسخه المطبوعه

• استخدمو تطبيقات تمارين ذهنية

شعله او Lumosity

من تجربتي للاثنين تراهم نفس الشي بس واحد عربي و واحد انجليزي

• اتعلمو لغة جديدة

طبعا ما يمديكم تتعلمو اللغه كامله في هذي المدة القصيرة بس يمديكم تتعلمو الأساسيات و تنموها بعدين

طبعا عندي تدوينه كامله عن العناية بالذات هنا

لكن في نشاطات ممكن تكونو نسيتوها

• حطي ماسك لوجهك 

• حطي مناكير تحبيه

• سوي مقشر لجسمك و ادخلي خذي حمام استرخاء دافي

• سوي يوم سبا لنفسك - بتحصلي في يوتيوب كثير فيديوهات تفيدك

• سوي لنفسك اكله تحبيها و شوفي فيلم او مسلسل

• ختمي نتفلكس و مواقع الافلام 

• اجلسي مع اهلك سوو حلا و تقهوو

• اي نشاط يسعدك و يخليك مبسوطه داخليا

طبعا ما يمديني اعدد لكم كل شي لان 1 ما عندي وقت اكتب كل هذا الكلام,2 محد عنده وقت يقرأ كل هذا الكلام.

لكن كعادتي معاكم بعطيكم قائمه تشغيل مخصوصة لهذي المناسبة هنا