العناية بالبشرة

1. غسول

2. تونر

3. ترطيب

4. واقي الشمس في النهار

طيب الغسول معروفه فوائدة لكن برضو بذكرها

• الغسول

وظيفته انه يشيل التراب و الاوساخ و الزيت الزائد و البكتيريا اللي تؤدي الى ظهور الحبوب

• التونر

التونر وظيفته انه يعادل حموضة البشرة -هذي وظيفته الاساسية-

طب ليش مهم؟ تخيلو انو عندكم شاحنه و هذي الشاحنه تحتاج ديزل عشان تشتغل, و قررتي بفزلكتك تحطي بنزين عشان توفري فلوس, هل الشاحنه حتشتغل بشكل 100%؟ 

لا. لانك ما وفرتي لها البيئة اللي تحتاجها, طيب مثال اخر, جيتي تسوي شاهي, و جبتي موية باردة و حطيتي فيها اللبتون, هل الشاهي بيصير؟ لا, لانك ما وفرتي البيئة اللي تحتاجها اوراق الشاهي عشان تحرر فوائدها في الموية و تسوي لنا الشاهي

بشرتنا لها معدل حموضة طبيعي, المنتجات مصممه عشان تعطينا فوائدها بشكل اعلى كفاءة لما بشرتنا تكون متعادله

عشان كذا التونر مهم جدا, و حاليا صارت الشركات تختار مواد فعاله في التونر عشان يعالج مشاكل متعددة زي ملمس البشرة- الحبوب الصغيرة اللي لونها زي لون جلدك و مالها راس- و لونها و كمية الزيوت المفرزة و ما الى ذلك

•  المرطب

 المرطب وظيفته يحافظ على ترطيب و ليونه بشرتك و يحميك من التجاعيد مستقبلا, انتبهي انه يكون معطر - عطر + بشرة وجهك= ليس جيدا-

“طب انا بشرتي دهنية ما احتاج مرطب” لا يا مدام بطاطس, البشرة الدهنية لو غسلتيها و شلتي الزيوت الطبيعية تعرفي ايش يصير؟ بشرتك تقول” ايش السالفة ليش ناشفين احنا؟” و تزيد افراز الزيوت و كنك يبو زيت ما غزيت - حطيت زيت بدال زيد, كيف بس مستوى السماجه؟-

المرطبات لها انواع

مرطب زيتي, مرطب جل, مرطب متوسط, مرطب معالج, الخ

البشرة الدهنية يناسبها المرطب الجل في حاله تحسي المرطب العادي يخلي وجهك مراية من كثر الزيت

الجافه تحتاج مرطب اقوى شوية 

المختلطه استخدمي اللي يناسبك و يريحك

الحساسة دوري مرطب للبشرة الحساسة

هذا روتين العناية اللي تحتاجه البشرة الطبيعية لكن مو بالضرورة يكون كافي و هنا تجي الخطوات الاضافية اللي البعض يعتبرها “دلع“

لو بشرتك فيها مشاكل زي مثلا التصبغات - مالها علاقة بالوصاخه لها علاقة بكمية الميلانين في جسمك لحد يضحك عليكم- حبوب, اثار الحبوب, ملمس بشرة غير ناعم, بشرة باهته,الخ

العلاج ممكن يكون بستخدام سيروم, او مقشر, او قناع 

العلاجات هذي كلها بستثناء التقشير تدخل بعد التونر و قبل المرطب على طول

• التقشير

اهمية التقشير انه يشيل طبقة الجلد الميت اللي فوق البشرة عشان تستفيدي من المواد الفعالة في منتجاتك, تخيلي انك تحطي قناع على وجهك و انتي متنقبة, هل بيكون له اثر؟ طبعا لا النقاب بيمتص كل الفوائد و يمنعك انك تستفيدي الجلد الميت هو النقاب

التقشير نوعين

برضو لما تقشري بشرتك انتي تحفزي تجدد البشرة و بالتالي تصير نضرة اكثر و فيها حياة و اي مشاكل موجودة على سطح البشرة تختفي او تنحل اسرع

• السيرومات 

السيروم عبارة عن مادة , ممكن تكون حمض او فيتامين او مجموعه مواد تستهدف مشكله في البشرة تحطيها قبل المرطب, السيرومات تختلف و كثييييير و ما بقدر اعددها كلها هنا لكن بختصار, السيروم ممكن يكون لمحاربة تجاعيد, توحيد لون, تصقير مسام, تقشير, ترطيب, ال شي ممكن تفكري فيه في سيروم يسويه - لسة استناهم يسوي السيروم اللي يعبي حساب البنك فلوس-

• القناع

الاقنعه و ما ادراك ما الاقنعه, تتنوع الاقنعه و تختلف بحسب المواد الفعالة, طريقة وضع القناع, طريقة ازالة القناع, المشاكل اللي يعالجها, الخ اهم الانواع هي

القناع اللي ينغسل

هذا القناع من اسمه تحطيه و تخليه على وجهك و بعد فتره تغسليه, اشهر الانواع اقنعه الطين و اقنعه الترطيب و الاقنعه المنزلية - اللي تخليك تحطي نص الثلاجه في وجهك-

القناع اللي يتقشر

هذي الاقنعه اللي تحطيها على وجهك و تخليه لين ينشف بعدين تقشريه زي الاستيكر, اشهرها فناع الفحم الاسود اللي انتشر قبل فتره, في ناس تكره هذي الاقنعه و تشوف انها تسبب ضرر اكثر من نفعها لانها تسحب و تشد الجلد و تعور بعض الناس وقت الازالة + احيانا تشيل شعر الوجه

الاقنعه اللي ما تنغسل او تتقشر

هذي اقنعه تحطيها ولا تشيليها زي الكريم او السيروم في منها الاقنعه الورقية , تجيك ورقة مشبعه بسائل “سيروم” تحطيها على وجهك فتره بعدين تشيلي الورقة و تسوي مساج لوجهك الين بشرتك تتشرب السيروم تماما, و في الاقنعه الكريمية, زي الكريم بالضبط و احيانا تصير بديل للمرطب, تكون غالبا قبل النوم عشان تطلع فائدتها و انتي نايمه و جسمك جالس يبني نفسه و يسوي عمليات ترميم

• اول شي, شفتي الاستيكر اللي مكتوب عليه كلام كثير ورا كل منتج؟ هذا لازم تتعلمي تقرأيه, اي مادة ما عرفتي ايش هي افتحي قوقل من جوالك الحلو وابحثي عن فوائدها و استخداماتها

• خليك مستهلك ذكي! شفتو تونر بيكسي اللي انشر قبل فتره و الكل اعلن له و مدح فيه ؟ في تونر من شركة اعشقها اسمها “ذا اوردينيري” اسمها حرفيا يترجم الى “ العادي” يا زينها من شركة, المهم, ذا اوردينيري عندهم تونر فيه نفس المواد الفعالة في تونر بيكسي و تركيزها اعلى و ما فيه اي مواد و عطورات مالها فائدة, تونر بيكسي تقريبا سعره في الستين, تونر اوردنيري سعره ما يزيد عن 50 ريال + الكمية ضعف تونر بيكسي. يعني عندك منتجين. واحد فيهم افضل و ارخص و كميته اكبر, بالعقل اي واحد بتشتري؟

• ابحثي ابحثي ابحثي, لا تشوفي منتج الكل يستخدمه و تشتريه عباطه, شوفي المواد الفعالة و قارني تركيزها, تابعي يوتيوبرز يتكلمو عن العناية بالبشرة -بضبطكم بقائمه تشغيل زي السكر

• i herb  و الصيدليات الاجنبية اصدقائك المفضلين, تحصلي فيهم منتجات رهيبة بأسعارها الاصلية 

• العناية بالبشرة تبدأ من الداخل- ما بقول لك صيري فيقان بس ركزي في اكلك- في اكلات لاحظت انها تسبب لي حبوب و صرت اقلل منها, اشرب مويا اكثر, اكل فواكه و خضار, اقلل منتجات البان -هذي اللي تلعب ببشرتي لعب- ركزي في بشرتك و انتبهي لها و انتبهي لاكلك و مع الوقت بتعرفي اليش الاكل اللي يسبب لك مشاكل في البشرة و قللي منه