قاتل المهارات الصامت
دخلنا عام 2022
و بدأنا نحدد أهداف و سقف توقعاتنا للسنة أعلى ما يكون صح؟
لكن في شي يتربص لنا في الظلام، إحنا الناس اللي نحط أهداف و نخطط إن السنة الجديدة بتكون مختلفة و أفضل، لا مو وهم البدايات الجديدة هذا وحش تعاملنا معاه و جلدناه لا تخافو
وحش هذي المرة مختلف، من نفس الفصيلة لكنه أشرس و يهاجم في أي فرصة يقدر عليها….
“المثالية الزائدة” هي وحش هذي المرحلة
و اللي أقصده هنا مو الرغبة بأن عملك يكون تم على أكمل وجه، لا أتكلم عن الهوس بالمثالية اللي يعيقنا عن أشياء و فرص كثييييير
أعطيكم مثال صغنون عشان توضح لكم الفكرة
هذا وسام
وسام يحب أن كل شي يكون مثالي و يطمح للأفضل
يحط لنفسه توقعات منطقية و عقلانية
وسام قرر أنه يتعلم يعزف بيانو، و بدأ يتعلم الأساسيات بدون ما يحط لنفسه توقعات، بعد كم أسبوع من التعلم قرر أنه يجرب يتعلم يعزف جزء من سيمفونية يحبها، و بدأ يتعلم و خلال أسبوعين قدر أنه يعزف 40 ثانية منها بدون أخطاء كبيرة و كان سعيد جدا بتقدمه هذا و بدأ يحاول يتطور زيادة
هذا حسام
حسام أيضا يحب يكون كل شي مثالي و يطمح للأفضل
لكنه يحط لنفسه توقعات فوق الطبيعي و غير واقعية
حسام أيضا قرر يتعلم بيانو زي صديقه وسام،
و بدأ يتعلم الأساسيات، وكان متوقع أنه بيتقنها خلال أسبوع، لكنه أتقنها خلال أسبوعين و لما ما قدر يوصل للمستوى اللي هو يبغاه، ترك البيانو تماما لأن “مستحيل يوصل للمستوى اللي هو يبغاه”
هذي قصة حسام و وسام، لكن قبل ما أقول لكم النهاية خليني أقول لكم
وسام تمكن من الأساسيات خلال خمسة أسابيع،
حسام أتقنها في أسبوعين فقط.
و في النهاية بعد سنة كاملة وسام أتقن عزف 4 سيمفونيات كاملة وحسام… ما يعرف غير “هابيبيرثداي” و “توينكل توينكل ليتل ستار”
لو أعطيتكم المعلومة الأخيرة عن أوقات تعلمهم للأساسيات و طلبت منكم توقع مين اللي بيتقن 4 سيمفونيات مين كان الشخص اللي بتتوقعوه؟
الأغلب كان بيتوقع أن حسام هو اللي بيستمر لأنه كان أسرع في البداية, لكن لإنه كان حاط لنفسه معايير أعلى من الطبيعي لما ما وصل لها “احترق” و استسلم
هذا بالضبط اللي يحصل للبعض مننا لما نقرر نتعلم مهارة جديدة أو نجرب شي جديد
ندخل بتوقعات عالية و لما ما نوصل لها نستسلم، أو أننا نماطل في بدء المهمات، لأننا خايفين أننا ما نوصل للتوقعات - سواء إحنا وضعناها أو وضعوها الناس لنا-
و هذا الوحش اللي أنصحكم بمحاربته هذي السنة.
ممكن تزودينا بأسلحة عشان نحارب المثالية الزائدة هذي؟
أبد ما طلبتو شي، حأعطيكم ترسانة من الأسلحة عشان الوحش هذا ما ينفع معاه سلاح أو سلاحين بس!
أول مجموعة أسلحة هي،
قائمة تشغيل في يوتيوب..- مدري أيش كنتو متوقعين صراحة مني لكن هذا أول شي المفروض تتوقعوه
في الصورة هذي مجموعة أسلحة تساعدكم، استخدموها بحذر…