زي ما يقول العنوان

اليوم بحاول أشارككم طريقة لعيش حياة “مريحة”

بتسألوني: أنفال ليش حاطة مريحة بين قوسين؟

و بجاوبكم: أولا هذول علامات تنصيص أو اقتباس مو أقواس، هل لازم نرجع لكتاب إملاء المتوسط؟ 

و ثانيا، راح تعرفو السبب أثناء قرائتكم لهذه التدوينة يا أعزائي

أتوقع - بل أنا متأكدة تأكيد تام 100%- أنو كلنا تمر علينا أيام جيدة و أيام سيئة صح؟ 

أحيانا تكون لعوامل خارجة عن يدنا، و أحيانا تكون في يدنا،

و لاحظت أنو أحيانا اليوم يكون “جيد” إنتاجيتي عالية، أنبسطت مع الناس اللي حولي، تفرجت أشياء احبها و سويت أشياء أحبها، لكن لما أجي أنام يجيني كائن صغير… كائن شوية يحب يوتر اعصابي - هو يتغذى على السلبية و المشاعر السيئة- و يقرقر في دماغي أنو اليوم كان سيئ، لأني كنت ابغى اسوي شي و ما صار،أو لأنو شي صار مو زي ما أنا كنت مخططه له،أو لأنو الحزام اللي لبسته كان شوية وسيع. الكائن راح ياخذ أي شي بسيييط و ينفخه و يهوله و يسوي من الحبة قبة

بعد سنوات من المحاربة و المحاولة في الكائن أنه يبعد وصلت لسلاح - أو ترسانة من الأسلحة- فعال جدا!

• خلي توقعاتك عقلانية

  أيوة، بكل بساطة، لا تتوقع أنك راح تبني روما و الأهرامات في يوم واحد، لو هدفك تكون مُنتج حط لنفسك أهداف واقعية لليوم

بدال ما تقول شي زي (اليوم بلخص محاضراتي و أذاكر) قول (اليوم بلخص أربع محاضرات و أذاكر أثنين) هذا هدف واقعي و سهل تحقيقه، لكنه برضو بيخليك تحس انو انتاجيتك عالية

• حدد أهدافك لليوم

  قبل ما تنام حدد 5 أشياء تبغى تسويها، وزي ما قلت خليك عقلاني، و لو حققت 3 منها أعتبر نفسك ناجح لهذا اليوم

  • قيمتك و سعادتك =\= إنتاجيتك

  مو لازم تكون منجز كل يوم، عادي تجيك أيام “عادية”، لو أنجزت هدف واحد من القائمة أو أنجزت 5، قيمتك و احترامك لذاتك المفروض ما يختلف

وحدة من الأشياء اللي لاحظت أنها أثرت علي هي أني أدون و أكتب، في مفكرة، في نوتس الجوال، في اي مكان، المهم أني أخرج اللي في داخلي عشان عقلي “يفضى شوية” فخلوني أشارركم سلاحين استخدمهم

• جاوب على سؤالين

  أيش كان كويس اليوم؟

  أيش كان ممكن يكون أحسن؟

  بكل بساطة، أول سؤال يذكرك تكون ممتن للأشياء الكويسة في حياتك و تحمد ربي عليها، و الثاني يدفعك للأنك تطور شي. بهذي الطريقة تقدر تضمن أنك لما تراجع في نهاية الأسبوع أو الشهر تقدر تشوف الأشياء المتكررة و ايش اللي فعلا يحتاج تغيير

• سوي “نموذج اليوم المثالي”

  بتقولو لي : يا أنفال أنتي عندك تدوينة عن اليوم المثالي ليش رجعتي جبتي طاريها دحين؟ 

  و بقول لكم: شكرا لأنكم فاكرينها، أحبكم

  لكن زي أي شي في الحياة قررت أطورها شوية لأنو حياتي شوية اختلفت

  بكل بساطة راح تحددو الأنشطة اللي تحسو أنكم لازم تسووها يوميا عشان تعبرو اليوم “كويس”  بعطيكم مثال من نموذجي أنا

في كل يوم أنا لازم:

1. أتعلم شي جديد.

2. أتحرك و أتمرن.

3. أصنع شي.

4. أساعد أحد.

5. أهتم بنفسي.

في نهاية اليوم راح افتح دفتري - أو التابلت حقي- و أكتب 

“اليوم:

تعلمت __________ من _________ و أنا فخورة بنفسي لأني أحاول أتعلم يوميا

تحركت بإني سويت _________ و هذا الشي خلاني أحس بالطاقة و الإمتنان لجسمي

صنعت ____________________ و أنا ممتنة لإني شخص مبدع و قادر على الإنتاج

ساعدت ______________بــ _________ أنا سعيدة لأني أقدر أساعد أحد و لأنو ربي سخرني لحل هذه المشكلة لهم

اعتنيت بــ ______________ لأني أستحق العناية”

و بالتالي مهما كان يومي دام أنا عبيت هذا النموذج يومي كان كويس، 

مثلا لو جا وقت النوم و أنا ما قدرت أتمرن، تمارين إطالة و عشرة نطات تكفي، لو ما قدرت أصنع شي كبير، مو لازم أسوي الموناليزا استيكر واتساب يضحك لصحباتي يكفي،  لو ما سويت لنفسي ماسك و جلسة استرخاء، كوني سويت روتين العناية بالبشرة و اخذت فيتاميناتي هذا يكفي، و هكذا 

هذي الأسلحة تسمح لك تعيش حياة مريحة وفي نفس الوقت تسمح لك تخرج من منطقة الراحة عشان تكون شخص أفضل و توصل لأهدافك

بكذا لما يجيني الكائن الصغير قبل النوم أقدر أردعه بالإحصائيات و الأرقام و النماذج و أخليه يعافر معاهم و أنا أغط في سبات عميييق