كيف أتعلم من يوتيوب ؟
التعلم الذاتي -ومن يوتيوب تحديدا- شي في متناول الجميع، و اسهل مما نتوقعه كلنا،
كل اللي تحتاجيه:
ورقة و قلم ( اي وسيلة جمع ملاحظات)
رغبه و دافع للتعلم ( اهم شي)
فيديو او مجموعه فيديوهات للتعلم منها ( في اي موضوع)
حرفيا هذا بس اللي تحتاجيه!
طبعا الدفتر ما يهم شكله او لونه او حجمه الا لك، لانك انتي اللي بتستخدميه ( احب يكون متوسط الى صغير الحجم, احسه اسهل في المراجعه)
اول خطوه هي اننا نلاقي موضوع نبغى نتعلم عنه ( الموضوع اسهل مما تتصوري، اي موضوع عندك فضول عنه اكتبيه و خلي عندك قائمه، و متى ما حسيتي ان عندك شغف للتعلم افتحيها و اختاري موضوع و ابدأي)
طيب اخترتي موضوع، و كتبتيه في محرك البحث، هل تضغطي اول فيديو و تبداي؟
نظريا ممكن بس ما انصح بهذي الطريقة الا في المواضيع الخفيفة، او اذا تبغي تاخذي فكره عن الموضوع مبدأيا.
أكبر محفز لي هو أن أبقى متحديًا لنفسي. أنا أرى الحياة كتعليم جامعي طويل لم أحصل عليه، كل يوم أتعلم جديدًا
- ريتشارد برانسون
طيب اخذتي فكره و فعلا حابة الموضوع، نبدأ بميزة في يوتيوب اسمها "قائمه التشغيل" ، انشئي وحدة جديدة سميها بأسم الموضوع مثلا انا مسميتها "marketing and stuff" سميها الاسم اللي يناسبك، بعدها اكتبي الموضوع في مربع البحث و شوفي الفيديوهات اللي تحسي انها بتفيدك و اضيفيها القائمه، بعدها شوفي ابسط تفرعات للموضوع و ابحثي عنها و اضيفيها نرجع لمثالي و نقول مثلا social media marketing & digital marketing & SEO، و برضو اضيف الفيديوهات اللي احس انها بتفيدني في قائمه التشغيل حقتي.
بعد ما جمعتي عدد من الفيديوهات قومي سوي لنفسك كوب قهوة او زهورات او شاي او المشروب اللي يساعدك على الروقان، البسي ملابس مريحه و جيبي قلمك و دفتر ملاحظاتك، و شغلي القائمه و اتفرجي عليها، خذي راحتك و اذا حسيتي في جزء ما فهمتيه عادي ارجعي شوفي الفيديو مره ثانية، و كل فيديو سجلي ملاحظات عن اهم النقاط فيه، و هذي الخطوة انتي لك التحكم فيها، تبغي تشوفي القائمه كلها مره وحدة عادي، تبغى كل يوم تخصصي ربع ساعه برضو عادي
اهم شي المراجعه اللي تسوينها كل بين فتره و الثانية -ايوة زي مراجعه الجامعه/المدرسة- مو لازم تحفظي المعلومات بس حلو انها دايما تكون طازة في دماغك، و المراجعه هذي مجرد قراءة و كذا نكون خلصنا .
هذي الطريقة اللي انا استخدمها و اشوف كثيير يمدحها
و قائمه التشغيل هذي كل ما شفتي فيديو يناسبها اضيفيه لها، و بكذا تضمني ان القائمه متجددة و مليانه معلومات مفيده، و برضو شاركيها مع غيرك اذا حسيتي انهم مهتمين في الموضوع -مشاركه العلم شي ممتع- و حبة ورا حبه انتي بتلاحظي توسع مداركك و حتى ممكن تغير افكارك و نضجها.
و دحين اقدر اعطيكم قائمه بقنوات تلهمني و تفيدني و ارجع لها كثير