تطبيقات و منصات
للتعلم الذاتي.
سلام,
كلنا نعرف ان التعلم المستمر هو الطريق الى التطور و النمو, لكن مو كلنا يعرف كيف يتعلم أو من وين يبدأ رحله التطور الذاتي و النمو.
اليوم بشارككم منصات و تطبيقات للتعلم الذاتي, بعضها مجاني و بعضها مدفوع, بعضها عربي و بعضها انجليزي, بعضها بشهادات و بدون
بالنسبة لي الشهادة شي ثانوي و ما ابحث عنه بشكل كبير, لان
1- انا داخله الكورس لنفسي و عشان اطور مهاراتي
2- اهم شي عندي هو المعلومات اللي اخرج من الكورس بيها, سهل جدا ادخل كورسات كثييير لها شهادات بس من دون ما استفيد اي معلومه منه (سويتها قبل كذا بس حسيت انها هدر للموارد).
اول شي ببدأ بالمنصات الانجليزية لانها 1 اكبر و اكثر شمولا, 2 ممكن تكون طريقة لتحفيز الذات عشان تطورو الانجليزي عندكم.
1- udemy يودمي
منصة غنية عن التعريف, الكورسات فيها متنوعه بشكل مثير للدهشة, تصميم, رسم,بزنس,تسويق,موسيقى, تطوير ذات و كثيير تفرعات داخل كل فئة
اغلب الكورسات باللغه الانجليزية و في كورسات مجانية و كورسات مدفوعه, غالبا تصير في تخفيضات كبيرة و اذا في كورس عاجبكم شيكو عليه دائما لان يمكن ينزل عليه خصم جيد
زوروا موقعهم + عندهم تطبيق
2- coursera كورسيرا
كورسيرا يشبه يودمي في عدد المجالات المهول اللي ممكن تعلموها في هذه المنصة, ولكنه يزيد عليه كون هذه الكورسات بعضها مقدم من اكبر الجامعات في العالم!!
يعني و انتي منسدحه في غرفتك تحت مكيفك تقدري تاخذي كورس مجاني عليه شهاده من هارفارد او جامعه ادنبره او جامعه لندن, ايوة شهادة معتمده من هذي الجامعات العريقة تعتبر مكسب لاي شخص راغب بالتعلم و بتطوير بنكه المعرفي في اي مجال.
و ازيدكم من الشعر بيت, في شهادات دبلوم ممكن تاخذيها من الجامعات المذكورة فوق اضافة الى شركات عملاقة زي قوقل و بي أم اي.
هذا بالاضافة الى كون كثير من الكورسات مترجمه الى اكثر من اربعين لغه بفضل مجتمع المترجمين المتواجد على المنصة و يتطوع لترجمه الكورسات في وقت فراغه.
اخذت كورس اساسيات التسويق قبل ما اتخصص عشان يكون عندي خلفية اكبر عن التخصص و طبيعه الدراسة.
زوروا الموقع و اعرفو اكثر + عندهم تطبيق
3- Ed x إد كس
هذه المنصة شبيهه كورسيرا من ناحية الشراكات مع الجامعات العريقة, اغلب الكورسات مجانية و الشهاده بتكلفك مبلغ اضافي ممكن تدفعه في اي وقت( عادي تاخذي الكورس بس تدفعي و تاخذي الشهادة وقت تحتاجيها ميزة حلوة لطلاب الجامعات)
زوروا موقعهم + عندهم تطبيق
4- open culture اوبن كولتشر
هذا الموقع يجمع لكم الكورسات المجانية من عده مواقع, في عدة مجالات, إضافة الى انه يعتبر مصدر مفتوح للعديد من الاشياء زي الكتب الدراسية او العادية و الصوتية, الافلام و فيدوهات تعلم اللغات.
موقع شااااامل, لكن عيبه انه زحمه, بما انه مجاني فيه اعلانات مزعجة و مسببة زحمه فظيعة.
زوروا الموقع + ماله تطبيق للاسف.
المنصات التعليمية الانجليزية حرفيا بحر لو جلست اعددها لكم من اليوم الين نهاية حياتي ما اتوقع بخلص (صيغة مبالغه عشان ابين لكم مدى التنوع في المنصات و عددها الهائل) في منصات عامه و منصات متخصصة (كورسات تصميم فقط او كورسات في المجال الصحي او كورسات بزنس)
إيش رأيكم نبدأ في المنصات العربية؟؟
1- منصة رواق
احتمال كبير تكون اكبر منصة عربية تعليمية، تقدم دورات أكاديمية مجانية بالعربية في عدد مهول من التخصصات(الحاسب والبرمجة، الاقتصاد و الشريعة ومجالات الموهبة والإبداع والعلوم الطبية).
الدورات مقدمه بالشراكه مع مؤسسات اكاديمية و خاصة, و بإعداد من دكاترة جامعيين و نخبة من الخبراء
اول ما تخلصي الكورس و تنجحي في الاختبار تاخذي شهادة حضور و اكمال في بعض الدورات
الدورات تكون بأسلوب تفاعلي, عندك واجبات و اختبارات قصيرة (كويزات)
تفضلو و زوروا موقعهم من هنا + عندهم تطبيق
2- منصة إدراك
أنشئت منصة إدراك من قبل مؤسسة الملكة رانيا للتعليم والتنمية.
المنصة هذي عبارة عن تعاون بين edx و مؤسسة الملكه رانيا
وتوفّر نوعين من التعليم الأول هو التعليم المدرسي والذي يُقسم المساقات تبعًا للمراحل الدراسية، أمَّا التعليم المستمر فهو التعلّم الحرّ، وهي عبارة عن دورات في مختلف المجالات كالتكنولوجيا والإدارة، ودورات مفيدة في المجالات الأكاديمية والمهنية.
تفضلو زورو الموقع من هنا
3- منصة مهارة
تخيلي منصة اول اهدافها هي تنمية مهارتك في جمييييع المجالات
منصة مهارة هي تابعه لرواق لكنها منصة مفتوحه للجميع, اللي عنده مهارة و قدرة على تعليمها لكسب مبلغ مادي و اللي يبغى يتعلم مهارات عامه زي تسويق بأنواعه, استخدام منتجات مايكروسوفت اوفيس و ادوبي و حتى حل مكعب روبيك (المكعب الملون الي تلفيه الين تخلي كل وجه لون واحد)
المنصة بسيطه و الكورسات فيها اسعارها متفاوته من أقل من 25ريال و انتي طالعة
هذا الرابط زوروها و اعرفو زيادة + مالها تطبيق للاسف
4- منصة دروب
منصة مدعومة من وزارة العمل السعودية لتقديم دورات في مجالات التي تدعم فرص الحصول على العمل.
يعني بالعربي الكورسات هنا تعتبر كنز لأي سعودي او سعودية يفكرو بالتوظف قريبا,و يحصلو على شهادات موثقة ومعتمدة من شركاء دروب.
يوفّر دروب دورات في السكرتارية واللغة الإنجليزية ومهارات التواصل، ودورات في الحاسب الآلي. الاطلاع على الدورات مجاني تماما, لكن زي ما نقول -الحلو ما يكمل- بعض الدورات مشاهدتها مجانية بس الشهادة عليها رسوم اضافية ( فرصة لطلاب الجامعه اللي ما يقدرو يتحملو تكلفة الشهادة حاليا).
الموقع كثير من صديقاتي جربوه و حبوه كثير.
انصح الكل يجربه.
الموقع من هنا + له تطبيق
و كذا اكون وصلت للنهاية, اتمنى المعلومات تفيدكم لو بشكل بسيط و تشاركوها مع معارفكم.
طبعا هذي المنصات تعتبر نقطه في بحر العلم, الواحد مهما وصل مستحيل يوقف تعلم, الا اذا ما يهمه انه يتطور, في هذي الحاله بيوقف في مكانه و الناس تتخطاه بكل سهولة, لان التعلم يزيد من المرونه و المهارات المفيدة في الحياة العملية و الاجتماعية.
طبعا ما ذكرت منصتي المفضلة “YOUTUBE”
لانها تحتاج تدوينه خاصة, لانها متفرعه و فيها المفيد و الغير مفيد, لازم الواحد يعرف ايش و مين يتابع و كيف يحصلهم, بذكر لكم بعض صانعي المحتوى اللي يحفزوني عشان اكون افضل. (التدوينات تحصلوها تحت في الازرار)
سلام, و لنا لقاء اخر ان شاء الله.
تحديث
السلام عليكم. احدثكم من قلب ازمه كورونا (كوفيد 19) و الحجر المنزلي
انتشر في الاونه الاخيرة ملف بي دي اف سواه الخطير الاستاذ (هاني جبرتي)
و حسيت انه مناسب للتدوينه هذي, يحوي منصات اكثر من اللي حطيتها هنا
طبعا اوجه شكر حار و كبير للاستاذ هاني على جهده و تعبه