التغيير بشكل عام شي ما نقدر ندرسة بدقة لأنه “متغير” لكن نقدر ندرس عوامله و عوامل السلوك البشري، و الدراسات تشير الى عدة أشياء و بتكلم عنها بشكل مبسط.

الناس -بشكل عام- تفضل عدم السعادة على جهل بشأن القادم - خلك على قردك لا يجيك اللي أقرد منه-

يعني تشوفي وحدة في وظيفة مو عاجبتها، و كل ما تشوفيها يكون واضح في وجهها الحزن و عدم الراحة، كل ما تقولي لها " أتركي الوظيفة" تقول " لا ما أعرف لو تركتها ايش بيصير لي و لا إذا بحصل وظيفة غيرها أصلا" رغم أنها أنسانة مجتهدة و ألف شركة تتمناها! لكن خوفها ماسكها

طيب أيش في أشياء ثانية دماغنا يخاف منها؟

• الخسارة:

يخاف الناس من التغيير لأنه قد يعني خسارة شي، ممكن هذا التغيير يعني أنهم مضطرين يشتغلو زيادة و بالتالي بيخسرو وقت مع عائلتهم، يمكن يخسرو بعض علاقاتهم.

• الحيرة و الجهل:

الناس تحارب التغيير اللي ما تعرف سببه، تخيلي لو أهلك فجأة مسكوك و حلقو لك شعرك، كذا بدون أي مقدمات! طبعا بتعصبي و تزعلي و تخافي، لكن لو أمك جلست معاك و قالت لك أنك لازم تحلقي راسك لأسباب طبية أو لأنه صاير تعبان أو لأي سبب و شرحت لك أهمية قص شعرك و أنتي اقتنعتي، هل تتوقعي الخوف بيكون بنفس المقدار؟

• الخوف من المسؤولية و فقدان السيطرة:

أحيانا لما تجينا ترقية أو فرصة نرفضها، مو لأننا شايفين أنها فرصة سيئة، بالعكس الفرصة جدا رهيبة، لكن أحنا مو واثقين من قدراتنا على الوصول لتطلعات الفرصة، تخيلوا معايا شخص محاسب، موظف جدا رهيب و مافي منه أثنين، مدير القسم بيتقاعد و رشحه هو عشان يصير رئيس القسم، الشخص هذا رفض الترقية و قال " ما أتوقع أني الشخص المناسب لهذه الوظيفة، خبرتي مو كافية و المهام المطلوبة أعلى من مستواي" أحيانا العذر هذا يكون واقعي - لو جبت وحدة في المتوسط و عينتها كرئيسة قسم مبيعات في بيبسي- لكن غالبا أن موظفنا المجتهد كان خايف من المسؤولية و مو واثق في قدراته، و التغيير ممكن يفقدنا السيطرة على نواحي أحنا نعتبرها روتين أو شي تعودنا عليه بشكل معين، التغيير يفقدنا هذي السيطرة.