التدريب الميداني
تخصص تسويق
قبل ما اذكر لكم تجربتي لازم اشرح لكم الوضع مع جامعتي, انا طالبة في كلية الدراسات التطبيقية و خدمه المجتمع -مو كلية خدمه المجتمع, كليتي عبارة عن ادارة اعمال بس الدراسة بالعربي و فيها تخصصات اكثر-
و متطلب مننا للتخرج تدريب ميداني في اي مؤسسة لمدة عشرة اسابيع ممكن في الصيف او في ترم دراسي اذا خلصتي المستوى الثامن خلال الترم الدراسي الاول, و في الاخير تكتبي تقرير و تناقشيه في الجامعه مع احد الدكاترة.
التقرير:
التقارير ثلاثة, اثنين شهريين تحطي المهام اللي سويتيها في جدول مع التواريخ و تجاوبي كم سؤال بسيط ,وواحد نهائي يكون بالقليل 25 صفحه و له معايير تحصليها في ملف بيرسلوه لك اسمه (دليل الطلبة) فيه كل شي تحتاجي تعرفيه من المهام المطلوبة الى نوع و حجم الخط في التقرير. -بحاول ارفع لكم نموذج للتقرير بعد ما اخلص منه-
المشرفين:
الجامعة بتحدد لك مشرفة اكاديمية تتابع معاك من الجامعه و تبليغها إذا بتغيبي او تطلعي او عندك مشكلة, لانها بتسوي زيارة مفاجئة لك في مقر العمل و تقيمك بناء عليها.
و جهه العمل بتحدد لك مشرف\ة ميداني\ة, بيكون مسؤول عنك في مقر العمل و يعطيك مهامك و يتابع معاك.
ممكن تجيبي فرصة فردية او الجامعه بتحطك في مكان - انا افضل الفرصة الفردية بس ما توفقت فيها للاسف-
الفرصة الفردية تحتاج موافقه من الجامعه و قسم التدريب النسائي كان جدا غير متعاون و بطيئ جدا في الرد و التجاوب , اذا عندك فرصة فردية راجعيهم من بدري و راجعيهم دائما.
تجربتي الشخصية في التدريب
انا تخصصي تسويق, تدربت في مجمع ريادة اعمال الخبر بإدارة و تشغيل ذا قريك كامبس
المجمع كان في بداياته و هذا يعني ان مهامي كان اغلبها لبناء الشركة من الصفر - كان شرف لي الصراحه و شي افتخر فيه - كان في التدريب معايا ثلاث بنات, وحدة صديقتي و رفيقة دربي و تخصصي و بنتين تخصص نظم معلومات إدارية (MIS) مهامنا كانت مختلفة لكننا كنا نشتغل كفريق اغلب الوقت و نساعد بعض في المهام,
و صرنا صديقات و اكثر شوية, صح احيانا كان الشغل متعب لكننا كنا نداوم في مكان حلو و اغلب طاقم العمل متعاون و لطيف معانا.
المهام كانت متنوعه بعضها لها علاقة بالتخصص و بعضها ماله علاقة, و كنا نحاول نتعلم في كل الفرص المتوفرة لنا, و هذا هو جوهر التدريب, التعلم و تطبيق المقررات اللي درستيها في الجامعه و تجربة بيئة العمل قبل التخرج, و حتى ممكن تحصلي عرض وظيفي في الشركة.
التدريب اشوفه فرصة ذهبية للطلاب و الطالبات و حتى لو جامعتك ما تطلبة انصحك تروحي اي برنامج تدريبي في اي شركة و يكون له علاقة في تخصصك, لما تطبقي العمل تفهميه اكثر و تتعلمي اكثر من الف محاضرة نظرية - صيغة مبالغه- و التطبيق يثبت المعلومه في راسك لان عندك شي يدعمها و يثبتها
نصائح اقدمها لأي مقبلة على التدريب
- قبل الدوام روحي اشتري دفتر خاص للمهام و سجلي فيه بشكل مستمر عشان يسهل عليك التقرير الشهري
- اي مهمه يطلبوها منك اذا ما عرفتي تسويها اطلبي مساعدة اولا عشان الشغل يكون صح و ثانيا عشان تتعلمي الحل الصح
- لا ترفضي اي مهمه بحجة (ما اعرف) اللي ما يعرف يتعلم, و اللي ما يتعلم ما يتطور.
- خلي علاقتك مع زميلاتك حلوة و تعرفي عليهم و ساعدو بعض اذا احتجتو شي من بعض
- تعالي في وقت الدوام و لاتتأخري و اذا صار لك ظرف على طول بلغي المشرفين او زميلاتك المتدربات
- ابدئي التقرير النهائي بدري قد ما تقدري - لان احنا فجأة قدمو تاريخ التسليم و انصرعنا شوية-
- لا تمسحي الملفات اللي سويتيها في جهه العمل لان احتمال تحتاجي تحطي نماذج منها في التقرير
و اخر و اهم نصيحه خلي نيتك صافية و تعلمي قدر المستطاع و استمتعي بكل لحظه