منظم الحلقات بالضبط زي الملفات الكبيرة اللي فيها حلقات تنفتح و تتسكر عشان نحط فيها شفافيات او اوراق، و كالعادة بعطيكم مقدمه بسيطه عن حكايتي معاها،

في صيف 2016 بعد ما تخرجت من الثانوي قررت اتوظف في الصيف في السوق -توظفت في محل ملابس نسائية اذا حابين تعرفو عن تجربتي زيادة ممكن اكتب عنها تدوينه كامله- و مع الوظيفة جا الراتب طبعا، و انا كنت دخلت عالم المنظمات و بدأت اشوف فيدوهات للمنظمات (بلانرز) و وقعت في غرامها بشكل عنيف، حبيت اني اقدر اشيل و احط الاوراق زي ما يناسبني و ان له احجام مختلفة -بشرح لكم الاحجام زيادة تحت- و ممكن اسوي مطبوعاتي الخاصة او اشتري مطبوعات جاهزة لحجم منظمي، و طبعا فتحت امازون و حصلت منظمي و طلبته مع اوراق تعبئة "مطبوعات" من شركة. و لما وصلتني ما تتخيلو السعادة اللي شعرت فيها، و بما ان الجامعه كانت على الابواب بدأت التنظيم على طول، و بشارككم الايجابيات و السلبيات بعد ما اعطيكم تفاصيل عن المنظمات هذي بشكل اكبر -روابط للشراء عشان اسهل عليكم البحث-

 زي ما انتو شايفين الحلقات المعدنية هذي تسمح لنا نغير مكان الاوراق وونضيف اوراق زي ما يناسبنا، اضافة الى ان المنظم يجلس معاك سنين ودنين، كون الاوراق تنشال و تتحط

طب كيف اعرف المنظم المناسب لي؟

 اول شي، ايش احتياجك و استخدامك للمنظم؟

 من هنا نقدر نقدر الحجم اللي تحتاجيه

 A4, A5, A6....

-اذا انتي منظمك ثابت في المكتب خذي الاحجام الكبيرة، اما اذا انتي تشيليه معاك في كل مكان الصغيرة يمكن تناسبك اكثر-

ايش الستايل اللي تبغيه؟

طبعا في منظمات بحلقات بلاستيكية جاهزة و خالصة و برضو تقدري تضيفي عليها اوراق

و في البايندر اللي بحلقات معدنية زي اللي وريتكم فوق

و منظمات زي الدفاتر بسلك

و منظمات دفاتر عادية

و القائمه تطول - ان شاء الله يمديني اكتب لكم عنهم كلهم-

طب قررتو انكم تبغو تجربو هذا النوع من المنظمات 

ممكن تحصلوه في شي إن و جولي شيك 

او اي موقع يبيع كماليات و قرطاسية ابحثو عن عبارة “binder planner“

بس بداية انصحكم انكم تشترو منظم ارخص الين تلاقو الطريقة اللي تحقق لكم اكبر نسبة تنظيم بعدا ممكن تنتقلو لماركات متخصصه زي “كيكي.كاي”

برضو ادخلو يوتيوب و انستا و بنترست و شوفو الناس كيف تستخدم المنظمات

في يوتيوب في مقاطع كثير لناس تكتب المهام و تزين المنظم و توريك كل شي

plan with me ابحثو عن هذه العبارة و بتحصلو كنز من الفيدوهات اللي ممكن تلهمكم - سويت لكم قائمه تشغيل تحصلوها هنا-

الاشياء الكويسة

• المنظم ممكن يجلس معاكي لسنوات طويلة بذات اذا جودته كويسة خصوصا انك بس بتغيري الاوراق اللي جوا

• في مطبوعات جاهزة للمنظم حقك تقدري تشتريها جاهزة و على طول تستخدميها

• المنظم فيه مكان احطي قلم و جيوب تشيل اشياء ثانية

• تقدري تخليه منظم لاشياء كثيرة من خلال تقسيمتك له

  
  

  طب السلبيات؟؟

• اذا انتي من النوع اللي يحب يشيل المنظم معاه في الشنطه ممكن يسبب لك وزن زيادة شوية

• الحلقات شوية متعبة في الكتابة فلازم اشيل الورق من المنظم

• المطبوعات الجاهزة مو سهل تحصليها في اي مكان

• المطبوعات اللي اشتريتها كان يومية و التدوين و التنظيم و التدوين اليومي ما ناسبني و وقفت بعد خمسة اسابيع

طب برضو الطريقة هذي ما تناسبكم؟؟

حاضر, المنظم الجاي ان شاء الله حيناسبكم 

و انا معاكم الين نحصل طريقة تناسبكم و نصير كلنا منجزين و رهيبين و نغير العالم