في رمضان كالعادة من كل سنة في زخم مسلسلات مجنون ، كان عندي قائمة صغيرة للمسلسلات اللي ممكن اعطيها من وقتي بعد الدراسة و الصلاة و الشغل كانت متنفس بعد يوم طويل ، اولها كان "الاختيار ٢" واللي في منتصف رمضان صدمني بالتناقض اللي وحتى لو في جزء مني كان يحب المسلسل تبخّر مو لشيء غير اني ما ابغى اشوف مسلسل عندي شك لو واحد بالمية في نوايا عمله، اوك مسلسل بوليسي حربي ممتاز على مستوى الوطن العربي بس اتوقع معد رح اكمله او اشوف الاجزاء القادمة منه .
كنت مبهرة بـ "لعبة نيوتن" من اول الحلقات قلت واو ! هذا المسلسل اللي من زمان انتظره قصة حقيقية تصير في مجتماعتنا العربية ، فقاعة الحلم الامريكي و الجنسية، تمثيل حقيقي خلاّني اتأثر واستمتع بالرغم من ان القصة ايضاً راحت لمنحنى ثاني تماماً غير اللي كان فبالي يعني كنت اتوقع احداث شخصية ناجحة حتكافح وتطور من نفسها عشان ابنها بس طلعت عادية، ضعيفة احياناً يمكن ذا المبهر في المسلسل ؟ يمكن
عموماً كان حلو وناقش مواضيع مهمة زي " الاغتصاب الزوجي" و علاقات الحب السامة اللي كلها اهانة .
"كوڤيد ٢٥" كالعادة يوسف الشريف القادم من عالم اخر مبدع جداً ، يتطور دايماً ، قصة رهيبة واحداث سريعة واخراج يحمّس 👏👏 دايماً غير .
كل المسلسلات اللي فوق تكلمت عنها بوقتها ، شاركت الناس رأيي عنها بوقتها الا واحد ، خبيتو لنفسي ، ما شاركتو الكل الا اقرب انسانه ليا ، مسلسل يعنيلي بكل تفاصيله ، ابهرني ، بكاني ، ضحكني ، خوفني ، احتواني ، مسلسل شفت فيه نفسي ، عيلتي ، مجتمعي ، مخاوفنا ، مشاكلنا ، مسلسل كان ع قد ما هو بسيط ع قد ماكان عميق .
"#خلي_بالك_من_زيزي "
بدأت المسلسل وانا ماعندي اي فكرة عنه ، قريت ان الحلقات حتكون قصيرة ١٥ حلقة فبدأت فيه بالاضافة اني احب تمثيل امينة خليل ودايماً مقتنعة انها تمثل ادوار مميزة بعدين اكتشفت انه لا فعلاً ٣٠ حلقة وليتو ماخلص ،البداية من اول حلقة اغنية المسلسل لحالها حكاية شارموفرز بأغنية اسمها "السلام" قديش الاغنية تكون مو مفهومة ف البداية بعدين مع الاحداث نبدا نقراها صح و نستوعبها وتنفك الشفرة .
القصة الاساسية باختصار سيدة متزوجة متوترة ٢٤ ساعة تحاول للمرة الرابعة انها تنجب طفل وماتضبط معاها و اثناء ماهي تتخذ قرارة المحاولة الخامسة بعجلة تتفاجئ ان زوجها خلاص مايبغى يكمل معاها !
قصة طلاق عادية صح ؟
بس الحقيقة انها اكثر من مجرد طلاق حلقة ورا حلقة المسلسل كان يثبت لي انو اعمق من كذا مع كل شخصية مع كل قصة مع كل حوار المسلسل عبارة عن تحفة خفيفة بس مهمة جداً .
ادري في ناس ممكن تقول انه كان تلقين معلومات بس ابداً ماحسيت كذا ابداً انا كنت استمتع وفي نفس الوقت اتعلم عشان كذا مستحيل انسى اللي تعلمته وكيف بديت فيه مها و انتهيت منه مها ثانية .
موسيقى المسلسل 💯
القصة و الاحداث 💯
التمثيل 💯 الكل بلا استثناء ابدع .
الاخراج 💯
هاذي توليفة المسلسل الناجح بالنسبالي 👏
ملخص النقاط اللي خلت المسلسل مميز كالتالي؛
*حقيقي عبارة عن حياتنا حرفياً .
*عرّفني ع مصطلحات جديدة . Ivf , shadow teacher
, Adhd .
*تناول اغلب الامراض النفسية اللي اصبحت تقريباً جزء من حياتنا العادية .
*خلاني اعرف قديش الحوار ممكن يغير كثير بحياتنا !
*برهنلي كيف ان في مواقف صارتلنا في طفولتنا شفنا وقتها انها تافهه ممكن تكبر معانا وتعيق حياتنا من غير مانحس .
*ناقش التنمر، العنصرية ، الزواج التقليدي ، الطلاق ، العلاقات السامة ، الامومة ، الابوة ، الاضطرابات النفسية ، النجاح و الفشل الدراسي ، الاخوة ، الغربة ، التضحيات الغير ملموسة وكثير اشياء !
*كل شخصية في المسلسل لها قصة مختلفة و العجيب اننا تعمقنا فيهم كلهم من غير مانحس بلخبطة او كثرة احداث ، سلس .
*مافي شخص شرير في العيلة ، في شخص مو مفهوم ولا هو فاهم نفسه اصلاً .
*عيشني كل المشاعر الانسانية واللي هو شي نادر .
*بسبب المسلسل زادت نسبة البحث عن الـ ADHDع قوقل , صاروا الناس اكثر وعي .
*والاهم اني مو قادرة اتقبل اي مسلسل بعده ، انا من وقتها للحين مو قادرة اشوف مسلسل بشغفي لحلقات "خلي بالك من زيزي "
ليش اتكلم عن مسلسل الان في ظل مايحدث في فلسطين و عالمنا العربي اجمع ،لان لازم نفهم انفسنا اكثر ، ندرك اهمية الصحة النفسية ، نوقف و نستوعب تصرفاتنا و اختياراتنا حتى ردّات فعلنا ، نعطي انفسنا فرصة نبكي ، نتألم ، نفرّغ ، نبطل نركض ونفهم شوي لان لو ماسوينا كذا الان حنندم بعد مايفوت الاوان .