ايش المصادر؟
😁تدوينة لكم ولروان خصيصاً
اليوم وعلشان خاطر صديقتي والمشجعة لي دائماً وابداً (روان) ححط المصادر اللي ساعدتني احسن من مستوايا في اللغة واللي ان شاء الله حتساعدكم، ممكن مو كلها تناسبكم لكن ححط الايجابيات والسلبيات لكل واحد منها وانتوا احكموا
وبكدة روان تنبسط واكون وفيت بوعدي اللي على قولتها قعدت 5000سنة (تقريباً بتاريخ الصين😂) الين اوفي بيه.
الكتب 书:
Ultimate Mandarin
اشتريته في 2014 ومعاه سيديهات فيها قراءة للمحادثات (الصراحة ما فتحتها الا كم مرة) والكتاب فيلو محادثات لكن تركيزي كان اكثر على القواعد واستخدامها.
السبب اللي ما خلاني اركز عليه كتير انه مافيلو كتابة بالكركترات فقط البين يين وديك الفترة ما كنت مركزة عليها مرة.
قاموس اللغة الصينية من Collins:
قلت قصتي معاه قبل اني جلست فترة احاول افهم طريقة استخدامه لكن مع الممارسة وبعد تعلم البين يين سرت كل ما القى كركتر ما اعرف معناه ابحث عنه فيه.
التواصل والتحادث باللغة الصينية:
الكتاب باللغة العربية لكن طريقة كتابة البين يين فيه عجيبة ومختلفة عن البين يين الفعلي في بعض الاحيان خصوصا للكلمات اللي تبدأ بـ(zh يخلي ترجمتها بالعربي (ز هـ) في حين نطقها المفروض يكون اشبه بحرف الجيم في العربية بما انو بيشرح بلغة اهل بكين الفصحى) لكن كان اعتمادي عليه في قراءة المعلومات الثقافية المرتبطة بالصين وعلى المحادثات المكتوبة بالكركترات الصينية مع البين يين.
Mandarin Chinese the easy way:
اخر كتاب اشتريته في هدي السنة والجميل فيه انه يحتوي على تمارين، اضافة لشرح (الببين يين) بشكل واضح واحتواءه على سي دي يعلم النطق.
قال الحكيم شون زي:
كتاب محتوي على حكم صينية للفيلسوف (شون زي)
الصراحة اشتريتو عشان فيلو الحكم مكتوبة باللغة الصينية بحيث احسّن من خطي واقلدها (او لانو كان عندي فلوس ما عرفت فين اوديها🙃).
(تحت الصورة الثالثة يسار)
Visual Chinese English:
قاموس مصور ساعدني في حفظ الكلمات عن طريق البحث بالصور او الموضوع وكنت امسك كل صفحة واجلس احفظ اللي فيها واراجع حفظي للكركترات اللي حفظتها منه في حساب انستجرام.
(الصورة الثانية)
常用汉语 (شانغ يونغ هان يو)
كتاب جميل يساعد على تحسين قدرتك في الحفظ من ناحية والخط من ناحية تانية لانه يحتوي على اغلب الكركترات الاكثر استخداماً في اللغة الصينية (تقريباً 32 صفحة فقط)
الحلو فيه انه معاه اقلام خاصة لو كتبتو بيها عالكركتر بعد 30 دقيقة راح تتمسح الكتابة وممكن نرجع نكتب فيه تاني…يستخدموه للأطفال عندهم لكنه ممتاز وساعدني في تحسين خطي.
(الصورة الاولى)
فيديوهات اليوتيوب YouTube视频:
الحق اعتمادي الاساسي كان عاليوتيوب واكثر قناة ساعدتني كانت قناة Ask Benny الصراحة بعد الله لها فضل كبيير عليا اني سرت اعرف تركيب الجملة في اللغة الصينية، غير حفظي لجمل كتيرة، القناة قديمة جدا الظاهر صاحبها منزل الفيديوهات من قبل حظر اليوتيوب في الصين بس عموماً كنت احمل الفيديوهات (خصوصا اللي خلفيتها سودة) واحولها بصيغة mp3 واسمعها طووول الوقت حتى في اصغر البريكات اللي القاها ايام الجامعة.
طبعاً القناة وقفت لكن فيديوهاتها ما تزال موجودة
حالياً ممكن تزوروا موقعه الاكتروني لانه شغال فيه.
كمان قناة yoyo chinese كانت قناتها ادمان وشرحها بطل بدأت معاها من كانت تنزل فيديوهات للمستوى المبتدئ الين ما وصلت مستوى فوق المتوسط.
قناة PeggyTeachesChinese كمان قناتها حلوة اتعلمت منها كتييير الفرق الوحيد ان لهجتها تايوانية وتستخدم الصينية التقليدية.
تطبيقات الجوال apps:
تطبيق chinese skill من افضل التطبيقات اللي استخدمتها ولليوم ما لقيت زيو. التحديثات فيه مستمرة غير واجهته الحلوة، اضافة الى احلى خاصية انه ممكن يعمل اوف لاين لو حملتو الباكيج تبعه.
*تحديث:
حالياً صارت النسخة غير مجانية، لكنه يضل من افضل التطبيقات اللي استخدمتها.
حسابات الانستجرام ومنها حساب yourmandarin مميز في مواضيعه واكتر شي احبه فيه انه يرد عالتساؤلات والاستفسارات، اضافة انو عندو فقرة كل بداية اسبوع يطلب من المتابعين يكتبو الكلمات اللي اتعلموها طوال الاسبوع (كنت احط كل اللي اتعلمته من القاموس وما ازال للان احاول التزم ازا نزل الفقرة هادي).
كمان في حساب لقيتو من فترة اسمه elementarychinese احلى شيء فيه انه ينزل كل يوم كلمات ومصطلحات ويركز على النطق ويسوي زي الاختبار البسيط على البين يين ،ممتاز جداً لو حابين تحفظوا الكلمة بالنطق الصحيح لها.
البرامج التلفزيونية 电视节目:
برنامج happy chinese على قناة cctv الانجليزية:
القناة الان ما بتعرضه لكن تلقوه عاليوتيوب طبعاً واتوقع موقع القناة كمان، الحلقات اللي في البداااية تنفع للمبتدئين.
برنامج تعلم اللغة الصينية :
برنامج جديد على cctvالعربية يعرض الان كل يوم الساعة 10:30
في برنامج كمان بنفس الاسم وكان على cctv العربية كمان يعلم المصطلحات الشائعة في اللغة الصينية، تلقوه على اليوتيوب.
في برنامج كان يجي على cctv العربية كمان بس مني قادرة افتكر اسمه لكنه كان كرتوني ويجي العصر زماان يمكن 2009 بالله اللي يعرف اسمه يقولي😥😓 ازا افتكرته حكتبو وازا افتكرت برامج تانية حرجع اكتبها.
📌بقية الكتب في الصورة فوووق زي كتب الـ hsk (اختبارات اللغة الصينية) اكيد تساعد لو حابين تاخدوا الاختبارات عشان الدراسة والعمل في الصين.
📌اما الكتاب اللي باللونين الابيض والاسود هذا فيلو تاريخ الكركترات ويوريكم طريقة كتابتها بالشكل المبسط والتقليدي وينفع للي يبغوا يحترفوا الخط (انا مو منهم🙄)
📌الكتاب النحيف اللي عليه اطفال برضوا عشان تعلم الكتابة.
📌المسلسلات والدرامات…هادي قصة تانية نخليها لمذكرات الربوع💁♀️
اخيراً…على قد ما التدوينة طويلة على قد ما أتمنى انكم تستفيدوا منها…ودمتم بود❤