شوية نصايح لرواد الأعمال و الشركات الناشئة

1. دايما كصاحب للشركة الناشئة خلي عندك شفافية في الحاجات اللي تخص الفريق بتاعك، الصراحة راحة

2. اوعى تكون فاكر ان موضوع الرؤية و الهدف دة كلام انشاء فارغ لو مش محدد هدفك ورؤيتك، صدقني هتضيع نفسك واللي معاك

3. من الحاجات المهمة جدا سرعة اتخاذ القرارات مع الحكمة والمشورة للناس اللي بتثق فيهم، اوعي تتأخر في قرار مصيري

4. اوعى اثم اوعى ثم اوعى تبيع حاجة مخلصتش هتفقد مصداقيتك جوة التيم ومع العملاء، بلاش تبيع الهوا هتتكشف أكيد

5. مش معنى إني بقول متبيعش حاجة مش خلصانة إنك متشتغلش وتعمل تسويق للمنتج من اول يوم لان دة الهدف من الشركة الناشئة “المنتج“، بيع يا ريس

6. مش مهم الفكرة بس تكون جامدة بس لازم يكون عندك إيمان كامل بقدراتك و دور على ناس بتحلم نفس حلمك

7. بعد ما يكون معاك ناس بتحلم نفس حلمك أوعى ثم أوعى ثم أوعى تخلي الحلم كابوس بعدها عمر الناس ماهتصدقك

8. مشروعك هو حلمك عشان يتحقق محتاج مجهود وصبر وإتقان، خلي بالك ليكون حلمك من أحلام اليقظة

9. الفريق بتاعك من أهم العوامل اللي بتأثر في نجاح أو فشل مشروعك محتاجين منك اهتمام كبير بيهم، خلي بالك من فريقك

10. من اهم الناس اللي لازم تكون موجودة او حد بيلعب الدور بتاعها المبيعات والتسويق، أنت بتشتغل عشان تحقق حلمك و تجيب فلوس

11. ما تعاملش الفريق بتاعك انهم عبيد عندك يعني يشتغلوا بال ١٢ساعة من غير ما هما يكونوا حابين دة، روح الفانلة مهمة جدا

12. متضغطش الناس بدون سبب وتقول نتزنق الشهر دة بس لو هيحصل كدة لازم تأهل الناس كويس، كتر الضغط يولد الانفجار

13. استمع دائما للنصيحة من صغير أو كبير ودورها في رأسك كويس يمكن عنده حق ، النصيحة حلوة مفيش كلام

14. لما تحط للفريق قاعدة متكنش أول واحد بيخالفها، خليك قدوة بالفعل مش بالكلام

15. متقولش كلام انت مش قده أو مش هتلتزم بيه، خلي وعودك على قدك عشان تقدر عليها

16. خلي دايما الناس شايفة انت بتعمل اية هتلاقيهم بيقدروك ويساعدوك و يوقفوا جنبك، خلي الناس شايفة الصورة كاملة

17. مش كل الناس تقدر تمشي بنفس سرعتك فياريت متزنقهمش معاك مش هيقدروا لو مش مستعدين، في فروقات شخصية أعرفها كويس

18. يا ريت دايما تكتب على قد ما تقدر الافكار والدروس المستفادة و الأخطاء اللي وقعت فيها، كل ما تكتب هتزيد فرصك في التعلم

19. من أهم الحاجات اللي بنصح بيها اي حد انه ينظم مواعيده و من أشهر الأدوات اللي ممكن تساعد هو Google Calendar خلي كل مواعيدك عليها، تنظيم الوقت مهم جدا

20. مش عيب إنك تتعلم طالما متعرفش ، العيب إنك تكابر و متتعلمش، مفيش حد كبير على التعليم

21. الثقة بينك وبين الناس اللي معاك شئ مهم جدا هيفرق كتير قوي وهيبان في وقت الشدة، لو وثقوا فيك هيدوك عيونهم

22. بلاش تخش على الشغل مرة واحدة يا ريت تخطط الأول وتحدد أولوياتك، لو مخططتش للنجاح يبقى اكيد انت خططت للفشل

23. في برامج كتير تقدر تساعدك في تنظيم قائمة المهام أبسطهم الورقة والقلم، اختار اللي يريحك

24. بيئة العمل من الحاجات المهمة جدا حاول كصاحب شركة انك تعمل بيئة عمل جذابة للناس، بيئة العمل الحلوة نعمة

25. الناس بتقعد في الشغل أكتر ما بتقعد في بيوتها، حاول كصاحب شركة إنك تريحهم على قد ما تقدر، بين باجز بقى و نسكافيه دهبي و كدة يعني

26. قيم الشركة مهمة حاول كصاحب شركة انك تزرع القيم اللي شايفها في شركتك، بس يا ريت متكونش حبر على ورق بس

27. إختار الناس اللي هتشتغل معاك بعناية، أهم حاجة يكونوا بيحبوا يتعلموا، العلام مهم مفيش كلام

لو شايف ان في نصايح تانية ممكن تتضاف إتفضل